
Microsoft : మైక్రోసాఫ్ట్ సేవల్లో తీవ్ర అంతరాయం ఏర్పడింది. ఒక్కసారిగా సమస్య రావడంతో ప్రపంచవ్యాప్తంగా వేలాది మంది ఇబ్బందులు పడ్డారు. ఔట్లుక్, మైక్రోసాఫ్ట్ టీమ్స్తో పాటు మరికొన్ని సేవలు పనిచేయడం ఆగిపోయాయి. దీంతో ఆఫీసుల్లో ఉద్యోగులు తమ పనులు చేసుకోలేకపోయారు. నవంబర్ 12 గురువారం మొదలైన ఈ సమస్య నవంబర్ 13 శుక్రవారం కూడా కొనసాగింది. ఒక దశలో ఔట్లుక్ పనిచేయడం లేదంటూ దాదాపు 1.30 లక్షల మంది కంప్లైంట్ చేశారు. డౌన్డిటెక్టర్ వెబ్సైట్లో ఈ ఫిర్యాదులు నమోదయ్యాయి. భారత్ సహా మొత్తం 74 దేశాల నుంచి వినియోగదారులు ఈ సమస్యను ఎదుర్కొన్నారు.
Also Read : హానీట్రాప్లో వింగ్ కమాండర్ బలి.. నగ్న చిత్రాల కోసం దేశ రహస్యాలు లీక్!
అసలు సమస్య ఎక్కడ వచ్చింది?
మైక్రోసాఫ్ట్ సర్వర్లలో వచ్చిన సమస్యే దీనికి కారణంగా తెలుస్తోంది. కంపెనీ సర్వర్లలో కొన్ని మార్పులు చేయడంతో వాటిపై ఒక్కసారిగా ఒత్తిడి పెరిగింది. దీంతో కొన్ని సర్వర్లు పనిచేయడం ఆగిపోయాయి. వాటిపై ఉండాల్సిన పనిని మిగతా సర్వర్లకు మార్చడంతో వాటిపై కూడా భారం పెరిగింది. ఇలా ఒక సమస్య కాస్తా మరింత పెద్దదైంది. అయితే ఇది హ్యాకింగ్ లేదా సైబర్ దాడి కాదని నిపుణులు చెబుతున్నారు. మైక్రోసాఫ్ట్లో జరిగిన సాంకేతిక పొరపాటు వల్లే ఈ సమస్య వచ్చిందని ఈస్కాన్ సంస్థ సీఈఓ గోవింద్ రామ్మూర్తి తెలిపారు. ప్రపంచవ్యాప్తంగా ఎన్నో సంస్థలు ఒకే టెక్నాలజీ సేవలను వాడుతున్నాయని, వాటిలో సమస్య వస్తే చాలా రంగాలపై ప్రభావం పడుతుందని చెప్పారు.
మైక్రోసాఫ్ట్ సిబ్బంది సర్వర్లను మళ్లీ పనిచేయించే ప్రయత్నం చేశారు. కానీ కొన్ని సర్వర్లు తిరిగి పనిచేయడం మొదలుపెట్టిన కొద్దిసేపటికే మళ్లీ ఆగిపోయాయి. ఎందుకంటే వాటిని తిరిగి అందుబాటులోకి తీసుకురాగానే వినియోగదారుల నుంచి ఎక్కువ మంది ఒకేసారి వాటిని వాడేందుకు ప్రయత్నించారు. దీంతో సర్వర్లపై మళ్లీ ఒత్తిడి పెరిగింది. దాదాపుగా 48 గంటల సమయం పడుతుందని చెబుతున్నారు.
ఈ సమస్య వల్ల ఔట్లుక్లో మెయిల్స్ పంపడం, చూడటంలో ఇబ్బందులు వచ్చాయి. మైక్రోసాఫ్ట్ టీమ్స్లో చాటింగ్, ఆన్లైన్ మీటింగ్లు సరిగా పనిచేయలేదు. వర్డ్, ఎక్సెల్, పవర్పాయింట్ ఆన్లైన్ సేవలను వాడేవారు కూడా ఇబ్బందులు పడ్డారు. అలాగే ఫైళ్లను ఆన్లైన్లో దాచుకునే వన్డ్రైవ్, షేర్పాయింట్ సేవలు కూడా ప్రభావితమయ్యాయి. మైక్రోసాఫ్ట్ ఏఐ టూల్ కోపైలట్లోనూ సమస్యలు వచ్చాయి. మైక్రోసాఫ్ట్ సేవలను ఉపయోగించే ఓపెన్ఏఐ, ఆంత్రోపిక్ సంస్థల కొన్ని సేవల్లో కూడా ఇబ్బందులు తలెత్తాయి.
Also Read : TVS నుంచి ఊరమాస్ ఎలక్ట్రిక్ స్కూటర్.. ఒక్కసారి ఛార్జింగ్ చేస్తే ఫుల్ మైలేజీ..!
భారత్లో విమానాలపైనా ప్రభావం
మైక్రోసాఫ్ట్ సేవల్లో వచ్చిన సమస్య భారత విమానయాన రంగాన్ని కూడా తాకింది. శుక్రవారం ఉదయం ఢిల్లీ నుంచి బయలుదేరాల్సిన స్పైస్జెట్కు చెందిన మూడు విమానాలను రద్దు చేశారు. వీటిలో పుణె, లేహ్, ముంబై వెళ్లాల్సిన విమానాలు ఉన్నాయి. మరో రెండు విమానాలు ఆలస్యంగా నడిచాయి. వాటిలో దర్భంగా, ముంబై వెళ్లాల్సిన విమానాలు ఉన్నాయి.
మరోవైపు, తమ విమానాల రాకపోకలపై ఎలాంటి ప్రభావం పడలేదని ఎయిర్ ఇండియా తెలిపింది. ప్రయాణికులకు సమాచారం అందించేందుకు ఈమెయిల్స్ను మరో మార్గంలో పంపించినట్లు చెప్పింది. ఇండిగో, ఆకాశ ఎయిర్ సంస్థలు కూడా ప్రయాణికులను అప్రమత్తం చేశాయి. విమానాశ్రయానికి బయలుదేరే ముందు తమ విమాన సమయాలను ఒకసారి చూసుకోవాలని ఢిల్లీ ఎయిర్పోర్ట్ ప్రయాణికులకు సూచించింది.









