హిందూ సంప్రదాయంలో విశిష్టమైన పండుగల్లో విజయదశమి ఒకటి. చెడుపై మంచి సాధించిన విజయానికి ప్రతీకగా ఈ పండుగను దేశవ్యాప్తంగా ఘనంగా జరుపుకుంటారు. అశ్వియుజ శుద్ధ దశమి నాడు వచ్చే ఈ పండుగ రోజున ఏ పని ప్రారంభించినా విజయం సిద్ధిస్తుందని.. లక్ష్మీదేవి అనుగ్రహం లభించి జీవితంలో అదృష్టం కలసివస్తుందని అందరూ నమ్ముతారు. అయితే విజయదశమి నాడు సరైన ముహూర్తంలోనే పూజ చేయడం చాలా మంచిది. సాధారణంగా మధ్యాహ్నం 2:00 గంటల నుండి 2:45 గంటల మధ్య ఉండే సమయాన్ని విజయ ముహూర్తం అంటారు. ఈ సమయంలో చేసే పూజలు, కొత్త వ్యాపార ప్రారంభాలు లేదా ఏవైనా శుభకార్యాలు విపరీతమైన విజయాన్ని ఇస్తాయి. అలాగే సాయంత్రం నక్షత్ర దర్శనం అయ్యే సమయంలో జమ్మి చెట్టు పూజ చేయడం చాలా మంచిది.

దసరా పండుగను ఇళ్లలో ఎంతో నియమనిష్టలతో, భక్తిశ్రద్ధలతో జరుపుకుంటారు. దశమి రోజున ఉదయమే తలస్నానం చేసి కొత్త దుస్తులు ధరించి ఇల్లు, పూజా మందిరాన్ని మామిడాకులు, రంగురంగుల పువ్వులతో అందంగా అలంకరించుకోవాలి. దుర్గాదేవి లేదా రాజరాజేశ్వరి దేవి పటాన్ని ఎర్రటి పూలతో అలంకరించి, పసుపు, కుంకుమ, ధూపదీపాలు సమర్పించాలి. అమ్మవారికి ఇష్టమైన పరమాన్నం లేదా పిండి వంటలను నైవేద్యంగా పెట్టాలి.

ఇక ఈ రోజున ఆయుధ పూజకు ఎంతో ప్రాధాన్యం ఉంది. మనం జీవనోపాధి కోసం ఉపయోగించే వాహనాలు, పుస్తకాలు, మిషన్లు, ఇతర పనిముట్లను శుభ్రం చేసి పసుపు-కుంకుమ బొట్లు పెట్టి పూజించాలి. దీనివల్ల మన వృత్తి, వ్యాపారాల్లో ఎలాంటి విఘ్నాలు ఉండవని నమ్ముతారు. అలాగే సాయంత్రం వేళ ఊరిలోని దేవాలయానికి లేదా జమ్మి చెట్టు ఉన్న ప్రదేశానికి వెళ్లి శమీ పూజ చేయడం ఆనవాయితీగా వస్తోంది.

జీవితంలో అదృష్టం కలసిరావాలంటే దసరా రోజు కొన్ని ప్రత్యేక నియమాలు పాటించాలి. శమీ పూజ చేసిన తర్వాత జమ్మి ఆకులను బంగారంగా భావించాలి. వీటిని ఇంట్లోని పెద్దలకు ఇచ్చి వారి ఆశీర్వాదం తీసుకోవాలి. అలాగే మిత్రులకు, బంధువులకు ఇచ్చి శుభాకాంక్షలు తెలుపుకోవడం వల్ల పరస్పర సంబంధాలు బలపడతాయి. కొత్త వ్యాపారం ప్రారంభించడం, వాహనాలు లేదా బంగారం కొనడం, పిల్లలకు చదువులు లేదా అక్షరాభ్యాసం ప్రారంభించడం వంటివి ఈ రోజు చేస్తే తిరుగులేని విజయం లభిస్తుంది.

దసరా రోజున పేదలకు అన్నదానం లేదా వస్త్రదానం చేయడం చాలా మంచిదని పండితులు చెబుతున్నారు. దీనివల్ల అమ్మవారి కటాక్షం లభించి ఇంట్లో సిరిసంపదలు వర్ధిల్లుతాయి. ప్రాచీన కాలంలో పాండవులు తమ అజ్ఞాతవాసం ముగించి జమ్మి చెట్టుపై దాచిన ఆయుధాలను వెనక్కి తీసుకుని విజయం సాధించింది ఈ విజయదశమి నాడే. కాబట్టి ఈ పవిత్రమైన పండుగను భక్తి శ్రద్ధలతో జరుపుకుని అమ్మవారి ఆశీస్సులతో విజయాలు సాధించవచ్చని పండితులు చెబుతున్నారు.