ఈ మధ్య భారత క్రీడాకారులు టెక్నాలజీ పరిజ్ఞానంపై ఎక్కువగా ఫోకస్ పెడుతున్నారు. ఇటీవల టీమిండియా స్టార్ ఓపెనర్, కెప్టెన్ శుభ్మన్ గిల్ తన నుదుటి భాగంలో ప్రత్యేకమైన చిప్ను ధరించి కనిపించడం అందరిలోనూ తీవ్ర ఆసక్తిని రేకెత్తించింది. త్వరలో న్యూజిలాండ్లో జరగబోయే వన్డే సిరీస్లో భాగంగా.. ఆక్లాండ్లోని ఈడెన్ పార్క్లో కేఎల్ రాహుల్, ఇషాన్ కిషన్లతో కలిసి నెట్ ప్రాక్టీస్ చేస్తున్న సమయంలో గిల్ ఆ టెక్నాలజీ పరికరాన్ని ధరించారు. దీంతో ఆ పరికరం ఎందుకు పెడతారు?, దాని వల్ల ప్రయోజనాలు ఏంటి? అనేవి పూర్తిగా తెలుసుకుందాం.
శుభ్మన్ గిల్ ధరించిన ఆ పరికరం పేరు ‘టెంపుల్ చిప్’(Temple Chip). ఇది ఒక న్యూరో వేరబుల్ డివైజ్. ఇది స్మార్ట్ వాచ్లు, స్మార్ట్ బ్యాండ్లు కంటే చాలా స్మార్టెస్ట్ ఫీచర్లను కలిగి ఉంటుంది. సాధారణంగా వాడే స్మార్ట్వాచ్లు, మిగతా బ్రాండ్లు కేవలం హార్ట్ రేట్, స్టెప్స్, బాడీ మూవ్మెంట్స్, బ్లడ్ ప్రెజర్, పల్స్ రేట్ను సూచిస్తాయి. కానీ ఈ టెంపుల్ చిప్ మాత్రం మెదడులోని రక్తప్రవాహాన్ని డీప్గా పరిశీలిస్తుంది.
ఈ పరికరాన్ని జొమాటో సహ వ్యవస్థాపకుడు దీపిందర్ గోయల్ నేతృత్వంలోని బృందం డెవలప్ చేసింది. ఇందులో సన్నని PPG (Photoplethysmography) సెన్సార్లు అమర్చుతారు. ఇవి మెదడులోని ఆక్సిజన్ లెవెల్స్, రక్తప్రసరణ సంకేతాలను డైలీ ట్రాక్ చేస్తాయి. అంతేకాకుండా ఇది యోగా, ధ్యానం, నిద్ర, ప్రాక్టీస్ సమయాల్లో బాడీలో కలిగే అనేక రకాల మార్పులకు మెదడు ఎలా రియాక్ట్ అవుతుందో క్లియర్గా విశ్లేషిస్తుంది. దీని ద్వారా క్రీడాకారుల ఒత్తిడి లెవెల్స్, ఫోకస్, రికవరీ సామర్థ్యాన్ని సరిగ్గా అంచనా వేస్తాయి.
ఈ టెంపుల్ చిప్ను రోజంతా నుదిటిపై ఉంచవచ్చు. ఇది తక్కువ రేడియో పవర్తో వర్క్ చేస్తుంది. ఎక్కువ సమయం డేటా ట్రాన్స్మిషన్ ఆఫ్లోనే ఉంటుంది. శుభ్మన్ గిల్ మాత్రమే కాకుండా.. గతంలో భారత స్టార్ షట్లర్, ఒలింపిక్ పతక విజేత పీవీ సింధు కూడా ఈ టెంపుల్ పరికరాన్ని ధరించి వైరల్ అయ్యారు.
అయితే ఈ డివైజ్ ఇంకా పూర్తిస్థాయిలో మార్కెట్లోకి అందుబాటులోకి రాలేదు. దీనికోసం ఇవాళ్టి నుండి ప్రీ-ఆర్డర్లు ప్రారంభమవుతున్నాయి. కంపెనీ దీనిని ట్రూ గోల్డ్, రోజ్ గోల్డ్, డార్క్ మిర్రర్, రియల్ జేడ్, డీప్ బ్లూ, పర్పుల్ ఫంక్ అనే 6 ప్రీమియం కలర్లలో అందుబాటులోకి తీసుకురానుంది.









