
రాష్ట్రంలో మహిళలకు అమలు చేస్తున్న ఫ్రీ బస్సు పథకం (మహాలక్ష్మి పథకం) పై సీఎం రేవంత్ రెడ్డి సంచలన వ్యాఖ్యలు చేశారు. ఈ మేరకు వికారాబాద్ జిల్లా హకీంపేటలో ఏర్పాటు చేసిన మెగా రైతు మేళా సమావేశ ప్రాంగణంలో మహిళా స్వయం సహాయక సంఘాల సభ్యులతో జరిగిన ముఖాముఖి కార్యక్రమంలో ఆయన మాట్లాడారు. అంతక ముందు హకీంపేటలో నూతనంగా నిర్మించిన ప్రాథమిక ఆరోగ్య కేంద్రాన్ని ప్రారంభించారు.
ఫ్రీ బస్సు పథకాన్ని ఆపాలని ఎంతో మంది చూస్తున్నారని.. కానీ ఎట్టి పరిస్థితుల్లోనూ ఈ పథకాన్ని రద్దు చేసే ప్రసక్తే లేదని సీఎం తేల్చిచెప్పారు. ముఖ్యంగా BRS నాయకులు ఆటో డ్రైవర్లను ఉసిగొలిపి ఫ్రీ బస్సు పథకాన్ని రద్దు చేయించడానికి ఎన్నో కుట్రలు పన్నారని ఆరోపించారు. కానీ మహిళలతో పెట్టుకుంటే తగిన రీతిలో బుద్ధి చెబుతారని తాను హెచ్చరించడంతోనే ప్రతిపక్షాలు వెనక్కి తగ్గాయన్నారు.
ఈ క్రమంలో ఆటో డ్రైవర్ల గురించి కూడా సీఎం రేవంత్ మాట్లాడారు. ఈ ఫ్రీ బస్సు పథకం వల్ల ఆటో డ్రైవర్లు నష్టపోకుండా.. వారిని ప్రత్యామ్నాయ మార్గాల్లో ఆదుకుంటామని తెలిపారు. మహిళా శక్తే తమ ప్రభుత్వానికి అసలైన బలమని అన్నారు. అక్కచెల్లెమ్మల ఆశీస్సులు ఉండటం వల్లే తాను ముఖ్యమంత్రిని అయ్యానని తెలిపారు. రాష్ట్రంలో కోటి మంది మహిళలను కోటీశ్వరులుగా మార్చడమే తన లక్ష్యమని పేర్కొన్నారు.
తమ ప్రభుత్వం మహిళలకు అన్నివిధాలుగా పెద్ద పీట వేస్తుందని తెలిపారు. ఇందిరమ్మ ఇళ్లను మహిళల పేరుతోనే మంజూరు చేస్తున్నామని పేర్కొన్నారు. అలాగే ఇంటి ఖర్చులు తగ్గించేందుకు ఫ్రీ కరెంట్, సన్నబియ్యం పంపిణీ వంటి కార్యక్రమాలను ప్రజలకు అందిస్తున్నట్లు చెప్పుకొచ్చారు. ప్రజల కోసం కంటి నిండా నిద్ర లేకుండా.. 34 నెలలుగా కష్టపడుతున్నానని తెలిపారు. ఈ 34 నెలలు తన కుటుంబాన్ని కూడా పట్టించుకోలేదని తెలిపారు. కంటి నిండా నిద్ర పోకుండా.. ఒక్క నిమిషం కూడా వృథా చేయకుండా ప్రజల కోసం పనిచేస్తున్నానని చెప్పుకొచ్చారు.









