కరీబియన్ సముద్రంలోని అందమైన ద్వీప సమూహ దేశం క్యూబా ప్రస్తుతం అత్యంత గడ్డు పరిస్థితులను ఎదుర్కొంటోంది. ఒకప్పుడు ప్రశాంతమైన జీవన విధానానికి, సామాజిక సంక్షేమానికి పెట్టింది పేరైన ఈ దేశంలో నేడు ఎటు చూసినా ఆకలి కేకలే వినిపిస్తున్నాయి. సుమారు కోటీ 10 లక్షల జనాభా ఉన్న ఈ దేశాన్ని సుదీర్ఘకాలంగా ఆర్థిక సంక్షోభం తీవ్రంగా పీడిస్తోంది. ముఖ్యంగా అగ్రరాజ్యం అమెరికా విధించిన కఠినమైన ఇంధన ఆంక్షలు, ఆకాశాన్ని తాకుతున్న ద్రవ్యోల్బణం, ప్రభుత్వం వద్ద తరిగిపోతున్న ఆర్థిక వనరులు క్యూబన్ల సాధారణ జీవితాలను పూర్తిగా తలకిందులు చేశాయి. దేశ ఆర్థిక వ్యవస్థకు వెన్నెముకగా ఉన్న పర్యాటక రంగం కుదేలవడంతో, ప్రజల ఉపాధి అవకాశాలు దెబ్బతిని కనీస అవసరాలకు కూడా నోచుకోని దయనీయ స్థితి నెలకొంది.

గత కొన్ని దశాబ్దాలుగా క్యూబాలో అధికారంలో ఉన్న సామ్యవాద ప్రభుత్వం ప్రజల సంక్షేమానికి పెద్దపీట వేస్తూ వచ్చింది. దేశంలోని ప్రతి పౌరుడికి ఉచిత విద్య, నాణ్యమైన ఆరోగ్య సంరక్షణ, రాయితీ ధరలతో కూడిన ఆహార పదార్థాలు, మెజారిటీ ప్రజలకు ప్రభుత్వ రంగంలోనే ఉపాధి అవకాశాలను కల్పించింది. దాదాపు 99 శాతం అక్షరాస్యత కలిగిన ఈ దేశంలో ప్రజల జీవన ప్రమాణాలు సాధారణంగా ఉన్నప్పటికీ, కనీస అవసరాలైన తిండి, బట్ట, నివాసం కోసం ఎవరూ ఇబ్బంది పడేవారు కాదు. ప్రజల ఆకలి తీర్చడం కోసం ప్రభుత్వం గతంలో బియ్యం, బీన్స్, పాలపొడి, చికెన్, వంటనూనె, గుడ్ల వంటి నిత్యావసర ఆహార దిగుమతులపై ఏటా 2 బిలియన్ డాలర్లకుపైగా భారీ మొత్తాన్ని ఖర్చు చేసేది. కానీ నేడు ఆ పరిస్థితులన్నీ గత చరిత్రగా మారిపోయాయి.

Also Read : పాక్‌ కొత్త ఎత్తుగడ.. టర్కీ నుంచి లక్ష ‘మెర్కుట్‌’ FPV డ్రోన్లు

అమెరికా విధించిన ఇంధన ఆంక్షలు క్యూబా జనజీవనాన్ని కోలుకోలేని విధంగా దెబ్బతీశాయి. ఇంధన కొరత కారణంగా రవాణా వ్యవస్థ, విద్యుత్ ఉత్పత్తి, వ్యవసాయ పనులు తీవ్రంగా ప్రభావితమయ్యాయి. దీనికి తోడు ద్రవ్యోల్బణం విపరీతంగా పెరగడంతో నిత్యావసర వస్తువుల ధరలు సామాన్యులకు అందనంత ఎత్తుకు చేరాయి. ప్రభుత్వ ఖజానా ఖాళీ అవ్వడంతో ఒకప్పుడు అందించిన రాయితీలను కొనసాగించలేక అధికారులు చేతులెత్తేయాల్సి వచ్చింది. ఫలితంగా, సగటు క్యూబన్ పౌరుడు తన కుటుంబాన్ని పోషించుకోవడానికి అష్టకష్టాలు పడాల్సిన దుస్థితి ఏర్పడింది.

ఈ తీవ్ర సంక్షోభ సమయంలో రాజధాని నగరం హవానాతో పాటు దేశంలోని వివిధ ప్రాంతాల్లో స్వచ్ఛంద సంస్థలు నిర్వహిస్తున్న సామాజిక వంటశాలలే స్థానికులకు ఏకైక జీవనాధారంగా మారాయి. హవానాలోని ఓ స్వచ్ఛంద సంస్థ నడుపుతున్న ఆహార పంపిణీ కేంద్రం వద్ద ప్రతిరోజూ వందలాది మంది ఆకలితో బారులు తీరుతున్నారు. ఉదయాన్నే ఏడు గంటలకు తలుపులు తెరిచే ఈ కేంద్రంలో పంపిణీ చేసే ఆహారం కోసం, కొంతమంది పేదలు తమ చేతుల్లో ప్లాస్టిక్ ప్లేట్లు పట్టుకుని ముందు రోజు రాత్రే అక్కడికి చేరుకుని రోడ్లపైనే పడుకుంటున్నారంటే పరిస్థితి ఎంత దారుణంగా ఉందో అర్థం చేసుకోవచ్చు.

ఈ ఆహార పంపిణీ కేంద్రాలకు వస్తున్న బాధితుల మాటలు హృదయాలను కలచివేస్తున్నాయి. తాము అత్యంత గడ్డు రోజులను గడుపుతున్నామని 71 ఏళ్ల రిటైర్డ్ సెక్యూరిటీ గార్డు ఫెర్నాండో ఫెర్నాండెజ్ ఆవేదన వ్యక్తం చేశారు. ఐదుగురు పిల్లల తల్లి అయిన 34 ఏళ్ల మర్లీస్ పాన్స్ మాట్లాడుతూ.. ఈ కేంద్రాల్లో అందించే ఆహారం వల్లే తన బిడ్డలకు కనీసం ఒక్కపూటైనా కడుపు నిండుతోందని కన్నీటి పర్యంతమయ్యారు. ఇలాంటి ఎన్నో కుటుంబాలు ప్రస్తుతం ఈ సామాజిక వంటశాలలపైనే ఆధారపడి ప్రాణాలు నిలబెట్టుకుంటున్నాయి.

అభద్రతా భావంతో కొట్టుమిట్టాడుతున్న క్యూబా ప్రజలను ఆదుకోవడానికి పలు ధార్మిక సంఘాలు, అంతర్జాతీయ సేవా సంస్థలు, ఐక్యరాజ్య సమితి ముందుకు వచ్చాయి. వీటి సహకారంతో నడుస్తున్న ఈ సామాజిక వంటశాలల్లో పెద్ద సైజు కడాయిలు పెట్టి అన్నం, గుడ్లు, పాస్తా వంటివి వండి వడ్డిస్తున్నారు. వీలు చిక్కినప్పుడల్లా కొద్దిపాటి చికెన్ కూడా వండుతూ.. చిన్నపిల్లల కోసం బాటిళ్లలో చాక్లెట్ పాలను నింపి అందిస్తున్నారు. మొత్తానికి అమెరికా ఆంక్షలు, ఆర్థిక మాంద్యం చక్రబంధంలో చిక్కుకున్న క్యూబా మళ్లీ కోలుకుని.. అక్కడి ప్రజల ఆకలి బాధలు ఎప్పుడు తీరుతాయోనని అంతర్జాతీయ సమాజం ఆందోళన వ్యక్తం చేస్తోంది.

Also Read : బంగ్లాదేశ్‌లో మళ్లీ హైటెన్షన్: హసీనా రీ-ఎంట్రీతో అవామీ లీగ్ యాక్టీవ్!