
ప్రపంచ కుబేరుడు ఎలాన్ మస్క్ సంచలన నిర్ణయం తీసుకున్నారు. అమెరికాలో ఉన్న ప్రతీ చిన్నారికి తన డ్రీమ్ కంపెనీ అయిన స్పేస్ఎక్స్కు చెందిన ఒక్కో షేరును ఉచితంగా ఇస్తానని తెలిపారు. ఈ ఊహించని గిఫ్ట్ వెనుక ఒక ఆసక్తికరమైన హైడ్రామా నడిచింది. అంతకుముందు రోజు ఆంథ్రోపిక్ అనే ప్రముఖ కృత్రిమ మేధ కంపెనీ తమ వద్ద ఉన్న 5 శాతం షేర్లను సమాజ సేవ, ప్రజా ప్రయోజనాల కోసం పబ్లిక్ బెనిఫిట్ ఫండ్ పేరిట స్వచ్ఛంద సంస్థలకు బదిలీ చేస్తున్నట్లు ప్రకటించింది. ఈ నిధులతో లాభాపేక్ష లేని సంప్రదాయ సంస్థలకు భారీగా విరాళాలు ఇవ్వాలని ఆంథ్రోపిక్ భావించింది.
అయితే ఈ విషయం మస్క్ మామా దృష్టికి వెళ్లడంతో అసలు కథ మొదలైంది. ఎన్జీవోలు, మధ్యవర్తిత్వ సంస్థలకు విరాళాలు ఇచ్చి చేతులు దులుపుకోవడం కంటే నేరుగా ప్రజలకే సహాయం చేయాలనేది తన కాన్సెప్ట్ అని మస్క్ చెప్పారు. మొదట ఓ ఇంటర్వ్యూలో డైరెక్ట్గా ప్రజలకే షేర్లు ఇస్తానని చెప్పిన మస్క్.. ఆ తర్వాత తన సొంత సోషల్ మీడియా ప్లాట్ఫామ్ ‘ఎక్స్’ వేదికగా క్లారిటీ ఇచ్చారు. వచ్చే ఏడాది నుంచి అమెరికాలోని ప్రతి చిన్నారికి ఒక్కో స్పేస్ఎక్స్ షేరు ఉచితంగా ఇస్తానని స్పష్టం చేశారు. ప్రస్తుతం మస్క్ వద్ద స్పేస్ఎక్స్కు చెందిన 480 కోట్ల షేర్లు ఉన్నాయి. ఇతర ఆప్షన్లు కలిపితే ఇవి 640 కోట్లకు చేరుతాయి. అంటే కంపెనీలో దాదాపు 48.4 శాతం వాటా ఆయనదే.
అమెరికా అధికారిక లెక్కల ప్రకారం 18 ఏళ్లలోపు పిల్లలు సుమారు 7.2 కోట్ల మంది ఉన్నారు. ఒక స్పేస్ఎక్స్ షేరు ధర మార్కెట్లో ప్రస్తుతం 146 డాలర్లు (దాదాపు రూ. 13,873). ఈ లెక్కన 7.2 కోట్ల మంది పిల్లలకు ఒక్కో షేరు చొప్పున పంచితే మస్క్ ఇస్తున్న మొత్తం విరాళం విలువ ఏకంగా 10.5 బిలియన్ డాలర్లు. అంటే మన భారతీయ కరెన్సీలో అక్షరాలా రూ. 1,00,000 కోట్లు. అయితే పిల్లల ఖాతాల్లోకి ఈ షేర్లను ఏ రకమైన సాంకేతిక ప్రక్రియ ద్వారా జమ చేస్తారనే విషయాలను మస్క్ ఇంకా సస్పెన్స్గానే ఉంచారు. ఈ వార్త బయటకు రావడంతోనే మార్కెట్లో స్పేస్ఎక్స్ షేరు ఒక్కసారిగా 150.53 డాలర్లకు ఎగబాగింది.
మస్క్ తీసుకున్న ఈ నిర్ణయంపై ప్రపంచవ్యాప్తంగా ప్రముఖ వ్యాపారవేత్తలు, మార్కెట్ విశ్లేషకులు ప్రశంసల వర్షం కురిపిస్తున్నారు. ఇన్వెస్ట్ అమెరికా, అల్టీమీటర్ క్యాపిటల్ అధినేత బ్రాడ్ గెర్స్టనర్ స్పందిస్తూ.. ఇది మానవాళి చరిత్రలోనే అతిపెద్ద దాతృత్వ బహుమతి. కోట్ల మంది పిల్లలకు చిన్నతనంలోనే ఉచితంగా ఒక జీవితకాల పెట్టుబడి ఖాతా దొరికినట్లయిందని కొనియాడారు. మరోవైపు పోటీలో ఉన్న ఆంథ్రోపిక్ సంస్థ కూడా తమ కంపెనీలోని మొత్తం 20 శాతం షేర్లను ప్రజా శ్రేయస్సుకే కేటాయిస్తున్నట్లు ప్రకటించి.. త్వరలోనే ఐపీఓకి సిద్ధమవుతోంది. ఏది ఏమైనా కార్పొరేట్ దిగ్గజాల మధ్య నడుస్తున్న ఈ దాతృత్వ పోటీ వల్ల అమెరికా పిల్లలకు మాత్రం ఒక భారీ జాక్పాట్ తగిలిందని చెప్పవచ్చు.









