
ఫ్రాన్స్లో నిత్యావసర ధరల పెరుగుదలకు వ్యతిరేకంగా విద్యార్థులు, ప్రజలు చేపట్టిన నిరసనలు ఒక్కసారిగా హింసాత్మకంగా మారాయి. గత వారాంతంలో దేశ వ్యాప్తంగా జరిగిన వీధి పోరాటాలు, విధ్వంసం తీవ్ర స్థాయికి చేరడంతో ఫ్రాన్స్ ప్రభుత్వం పలు ప్రధాన నగరాల్లో పాక్షిక కర్ఫ్యూ విధించింది. వ్యాపార సంస్థలు, ప్రజల ఆస్తులను కాపాడటమే లక్ష్యంగా స్థానిక అధికారులను కర్ఫ్యూ ఉత్తర్వులు జారీ చేయాలని ప్రధాని సెబాస్టియన్ లెకోర్ను ఆదేశించారు. నిరసనల కారణంగా చెలరేగిన హింసను అదుపు చేయడంలో భద్రతా దళాలు విఫలమయ్యాయని.. పరిస్థితి చేయి దాటిపోయిందని అంతర్గత వ్యవహారాల మంత్రి లారెంట్ నూనెజ్ బహిరంగంగా అంగీకరించారు.
France imposes nighttime curfews after violent protests
France has imposed nighttime curfews following violent protests, with authorities seeking to prevent large gatherings and restore calm.
Al Jazeera English https://t.co/ghBR4evGPI
— Amk News (@BreakingAmkNews) October 20, 2026
పారిస్లోని ప్రసిద్ధ ప్లాస్ డి లా రిపబ్లిక్, లెస్ హాలెస్ షాపింగ్ వీధుల పరిసర ప్రాంతాల్లో రాత్రి 11 గంటల నుంచి ఉదయం 6 గంటల వరకు పోలీసు కర్ఫ్యూ అమలులోకి వచ్చింది. అలాగే రాత్రి 8 గంటల నుంచే సభలు, సమావేశాలు, నిరసనలపై నిషేధం విధించారు. పారిస్తో పాటు లియోన్, నీస్, కోలైన్స్, లిల్లే వంటి ఇతర ప్రధాన నగరాల్లో కూడా కర్ఫ్యూ నిబంధనలను కఠినంగా అమలు చేస్తున్నారు. శనివారం జరిగిన దేశవ్యాప్త నిరసనల్లో ఐదు లక్షల మందికి పైగా ప్రజలు పాల్గొన్నారు. ఈ క్రమంలో ముసుగులు ధరించిన అల్లరి మూకలు ప్రభుత్వ కార్యాలయాలు, పోలీస్ స్టేషన్లు, షాపింగ్ మాల్స్పై దాడులు చేసి, నిప్పు పెట్టి పెద్ద ఎత్తున దోపిడీలకు పాల్పడ్డాయి.
ఈ తీవ్ర స్థాయి హింసాత్మక ఘటనల నేపథ్యంలో ఫ్రాన్స్ హోంమంత్రి లారెంట్ నూనెజ్ రాజీనామా చేయడానికి సిద్ధపడినప్పటికీ.. అధ్యక్షుడు ఇమ్మాన్యుయెల్ మాక్రాన్ ఆయన రాజీనామాను తిరస్కరించారు. పోలీస్ వ్యవస్థలో కమాండ్ విచ్ఛిన్నం కాకుండా చూడాలని ఇంటెలిజెన్స్ వైఫల్యాలు, ప్రణాళిక లోపాలపై పారదర్శక దర్యాప్తు జరిపించాలని మాక్రాన్ ఆదేశించారు. లూటీలు, దాడులకు పాల్పడే అల్లరి మూకలను అణచివేసేందుకు కొత్త వ్యూహాలను సిద్ధం చేయాలని స్పష్టం చేశారు. ప్రభుత్వం అవసరమైతే అత్యవసర పరిస్థితి ప్రకటించేందుకు కూడా వెనుకాడదని అధికారులు వెల్లడించారు.
వారాంతంలో జరిగిన ఘర్షణల్లో ఇప్పటివరకు 2,300 మందికి పైగా నిరసనకారులను పోలీసులు అదుపులోకి తీసుకున్నారు. ఈ దాడిలో దాదాపు 1,000 మంది పోలీసులు, జవాన్లు గాయపడ్డారు. పరిస్థితిని అదుపు చేయడానికి దాదాపు 60,000 మంది భద్రతా దళాలను రంగంలోకి దించినప్పటికీ, వందలాది షాపులు లూటీకి గురికావడంతో వ్యాపారులు తీవ్ర ఆవేదన వ్యక్తం చేస్తున్నారు. పాఠశాలల్లో తరగతుల రద్దీ, ఉపాధ్యాయుల కొరత, విద్యా రంగానికి అరకొర నిధులపై విద్యార్థులు ప్రారంభించిన ఈ ఉద్యమానికి యెల్లో వెస్ట్ ఆందోళనకారులు తోడవడంతో పరిస్థితి మరింత దిగజారింది.
ఫ్రాన్స్లో వచ్చే ఆరు నెలల్లో అధ్యక్ష ఎన్నికలు జరగనున్న తరుణంలో ఈ తరహా అలజడి, ఆర్థిక సంక్షోభం, పెరిగిన జాతీయ రుణాలు మాక్రాన్ ప్రభుత్వానికి మింగుడుపడటం లేదు. ఇప్పటికే పరిస్థితులు కొంత ప్రశాంతించినట్లు కనిపిస్తున్నప్పటికీ రాబోయే శనివారం మళ్లీ భారీ ఎత్తున నిరసనలు చేపట్టాలని యెల్లో వెస్ట్ మూవ్మెంట్ పిలుపునివ్వడంతో ఫ్రాన్స్ ప్రభుత్వం తీవ్ర ఆందోళనలో మునిగిపోయింది.









