
మధ్య ప్రాచ్యంలో ఉద్రిక్తతలు రోజురోజుకూ పెరుగుతున్నాయి. తాజాగా హర్మూజ్ జలసంధిలో పనామా దేశానికి చెందిన ఎల్పీజీ ట్యాంకర్పై గుర్తు తెలియని వ్యక్తులు దాడికి పాల్పడ్డారు. ఈ నెల 16న జరిగిన ఈ దారుణ ఘటన ప్రపంచవ్యాప్తంగా కలకలం రేపింది. ఈ ఘటనపై భారత్ తీవ్ర ఆందోళన వ్యక్తం చేసింది. ఈ దాడిని భారత విదేశీ వ్యవహారాల శాఖ అధికారికంగా ఖండించింది. వాణిజ్య నౌకలపై ఇలాంటి దాడులు పెరగడం అంతర్జాతీయ రవాణాకు పెను ముప్పని హెచ్చరించింది.
ఈ ప్రమాదానికి గురైన ఎల్పీజీ ట్యాంకర్లో మొత్తం 24 మంది భారతీయ నావికులు సిబ్బందిగా పనిచేస్తున్నారు. దాడి జరిగిన వెంటనే సహాయక చర్యలు ప్రారంభమయ్యాయి. ఇప్పటివరకు అందిన సమాచారం ప్రకారం నౌకలో ఉన్న 24 మందిలో 21 మందిని సురక్షితంగా రక్షించారు. వీరిలో తీవ్రంగా గాయపడిన ఇద్దరు నావికులను వెంటనే స్థానిక ఆస్పత్రికి తరలించి మెరుగైన వైద్యం అందిస్తున్నారు. అయితే ఈ భీకర దాడిలో మరో భారతీయ నావికుడు ఆచూకీ గల్లంతు కావడం తీవ్ర ఆందోళన కలిగిస్తోంది.
Also Read : బట్టతలకు శాశ్వత పరిష్కారం.. దాదాపు 100 శాతం జుట్టును తిరిగి పెంచే అద్భుతమైన ఎలక్ట్రిక్ దువ్వెన!
గల్లంతైన భారతీయ నావికుడిని వెతికేందుకు ఒమన్ దేశానికి చెందిన రక్షణ సహాయక బృందాలు రంగంలోకి దిగాయి. ఒమన్లోని భారత రాయబార కార్యాలయం ఈ గాలింపు చర్యలను ఎప్పటికప్పుడు పర్యవేక్షిస్తోంది. ఒమన్ అధికారులతో కలిసి ముమ్మరంగా గాలింపు చర్యలు కొనసాగుతున్నాయని.. ఆ నావికుడు త్వరలోనే సురక్షితంగా బయటపడాలని ఆశిస్తున్నట్లు అధికారులు తెలిపారు. హర్మూజ్ జలసంధి ప్రాంతంలో ఇలాంటి దాడులు పునరావృతం కావడం వల్ల సముద్ర మార్గంలో రాకపోకలు సాగించే వాణిజ్య నౌకల సిబ్బంది ప్రాణాలకు తీవ్ర భద్రతా ముప్పు వాటిల్లుతోందని ఆందోళన వ్యక్తమవుతోంది.
ఈ సముద్ర దాడికి సమాంతరంగా అమెరికా, ఇరాన్ దేశాల మధ్య ఘర్షణ వాతావరణం మరింత ముదిరింది. హర్మూజ్ జలసంధి సమీపంలో ఉన్న ఇరాన్కు చెందిన వ్యూహాత్మక ఖెష్మ్ దీవిపై అమెరికా బలగాలు భీకర దాడికి పాల్పడ్డాయి. దీవిపై అమెరికా యుద్ధ విమానాలు పలు మార్లు బాంబుల వర్షం కురిపించాయి. అయితే ఈ అమెరికా వైమానిక దాడుల్లో తమ దీవిలోని నివాస ప్రాంతాలు, వాణిజ్య భవనాలు లేదా కీలక మౌలిక సదుపాయాలకు ఎలాంటి ప్రాణ, ఆస్తినష్టం జరగలేదని ఇరాన్ ప్రభుత్వం అధికారికంగా ప్రకటించింది.
ఈ దాడుల వెనుక పెద్ద కారణమే ఉంది. అంతకుముందు బహ్రెయిన్లోని అమెరికాకు చెందిన కీలకమైన రాడార్ సదుపాయాలపై ఇరాన్ సైన్యం డ్రోన్లతో విరుచుకుపడింది. అమెరికా సైనిక స్థావరాలను లక్ష్యంగా చేసుకుని ఇరాన్ డ్రోన్లతో దాడి చేయడం ఇటీవలి కాలంలో ఇది మూడోసారి కావడం గమనార్హం. ఈ పరిణామంతో అప్రమత్తమైన అమెరికా సైన్యం ప్రతీకారంగానే ఖెష్మ్ దీవిపై ఈ దాడులు జరిపింది. అయితే ఇరాన్ జరిపిన డ్రోన్ దాడిలో గానీ, అమెరికా జరిపిన ప్రతీకార దాడిలో గానీ అమెరికా వైపు ఎలాంటి ప్రాణనష్టం జరగలేదని, సైనిక సిబ్బందికి లేదా యుద్ధ పరికరాలకు ఎలాంటి నష్టం వాటిల్లలేదని అమెరికా రక్షణ శాఖ స్పష్టం చేసింది.
Also Read : క్రిస్మస్ ద్వీపాన్ని ఆక్రమించిన లక్షలాది ఎర్ర పీతలు.. వీటి వింత ప్రయాణం వెనుక అసలు రహస్యం ఇదే









