పశ్చిమాసియా ప్రాంతంలో ప్రస్తుతం జరుగుతున్న ఉద్రిక్తతలను, ఘర్షణలను తగ్గించేందుకు అమెరికా, ఇరాన్ దేశాల మధ్య పాకిస్థాన్ మధ్యవర్తిత్వం వహిస్తోంది. ఈ శాంతి చర్చల్లో భాగముగా ఇరాన్ తన పట్టును విడవకుండా కొన్ని కీలకమైన, కఠినమైన షరతులను ముందుంచింది. తాము ఇప్పటికే శుద్ధి చేసిన యురేనియాన్ని ఏ ఇతర దేశానికి బదిలీ చేసేది లేదని ఇరాన్ ప్రభుత్వం స్పష్టంగా ప్రకటించింది.

Also Read : పసిడి ప్రియులకు గుడ్‌న్యూస్.. ఒక్కసారిగా దిగొచ్చిన బంగారం, వెండి ధరలు.. అసలు కారణం ఇదే!

పాకిస్థాన్ ఆర్మీ చీఫ్ జనరల్ ఆసిమ్ మునీర్ ఈ సంధి చర్చల నిమిత్తం ఇరాన్ పర్యటనకు వెళ్లారు. అక్కడ ఇరాన్ జాతీయ భద్రతా మండలి కార్యదర్శి మొహసెన్ రెజాయీ ఆయనతో సమావేశమై తమ ప్రభుత్వ నిర్ణయాన్ని వెల్లడించారు. ఇరాన్‌లో శుద్ధి చేసిన యురేనియంలో ఒక్క గ్రాము కూడా దేశ సరిహద్దులు దాటి బయటకు వెళ్లదని ఆయన స్పష్టం చేశారు. అమెరికా తమకు నమ్మకం కలిగించే విధంగా ముందస్తు చర్యలు చేపడితేనే తదుపరి చర్చలు సాధ్యమవుతాయని ఆయన తెలిపారు. ఇరాన్ విధించిన అన్ని షరతులకు అమెరికా అంగీకరించినప్పుడే నిజమైన శాంతి చర్చల ప్రక్రియ ప్రారంభమవుతుందని సోషల్ మీడియా వేదికగా తెలిపారు.

మరోవైపు ఇరాన్ విదేశాంగ మంత్రి అబ్బాస్ అరాగ్చీ ఒక ఇంటర్వ్యూలో మాట్లాడుతూ.. హర్మూజ్ జలసంధి మూసివేతపై ఎలాంటి సందేహాలు అవసరం లేదని తేల్చిచెప్పారు. అమెరికా తమ షరతులను పూర్తిగా అంగీకరించేంత వరకు హర్మూజ్ జలసంధి మూసే ఉంటుందని స్పష్టం చేశారు. ఈ మార్గం ద్వారా వెళ్లే నౌకలకు భద్రతా పరమైన సమస్యలు ఎదురవుతాయని హెచ్చరించారు. గతం లో ఇచ్చిన హామీలను, ఒప్పందాలను అమెరికా గౌరవించి అమలు పరిచే వరకు కొత్తగా ఎలాంటి చర్చలు జరిపే ప్రసక్తి లేదని ఇరాన్ విదేశాంగ మంత్రి స్పష్టం చేశారు.

ప్రస్తుతం పాకిస్థాన్ జరుపుతున్న రాయబార ప్రయత్నాలు ఫలించాలంటే అమెరికా, ఇరాన్ విధించిన ఈ కఠిన నిబంధనలకు తలొగ్గక తప్పని పరిస్థితి కనిపిస్తోంది. యురేనియం తరలింపు నిరాకరణ, హర్మూజ్ జలసంధి బంద్ వంటి నిర్ణయాలు అంతర్జాతీయ వ్యాపారం, చమురు సరఫరాపై తీవ్ర ప్రభావం చూపే అవకాశం ఉంది. అమెరికా ఈ షరతులపై ఎలా స్పందిస్తుందనే దానిపైనే పశ్చిమాసియాలో శాంతి నెలకొంటుందా లేదా అనేది ఆధారపడి ఉంది.

Also Read : వణికిపోతున్న ఆఫ్రికా.. మళ్లీ విస్తరిస్తున్న ఎబోలా.. ఈ ప్రాణాంతక మహమ్మారి నుంచి బయటపడేది ఎలా?