ప్రపంచవ్యాప్తంగా ఆసక్తి రేకెత్తిస్తున్న ఇజ్రాయెల్ సార్వత్రిక ఎన్నికలకు సమయం ఆసన్నమైంది. ప్రధానమంత్రి బెంజమిన్ నెతన్యాహు సుదీర్ఘ అధికార పగ్గాలను ముగించాలని భావిస్తున్న ప్రతిపక్ష పార్టీల నుంచి సవాలు ఎదురవుతోంది. 2023 అక్టోబర్ 7న హమాస్ జరిపిన దాడి దాని తదనంతరం గాజాలో మూడేళ్ల పాటు సాగిన హోరాహోరీ యుద్ధం తర్వాత జరుగుతున్న మొదటి ఎన్నికలు కావడంతో నెతన్యాహు నాయకత్వానికి ఈ ఎన్నికలు ఒక రకంగా ప్రజల తీర్పుగా నిలవనున్నాయి.

ఎన్నికల పూర్వ తుది సర్వేల ప్రకారం 120 మంది సభ్యులున్న ఇజ్రాయెల్ పార్లమెంట్ క్నెసెట్ లో అధికారం చేపట్టడానికి అవసరమైన 61 సీట్ల మేజిక్ ఫిగర్‌ను సాధించడంలో ఇరు కూటములు విఫలమయ్యే అవకాశాలు స్పష్టంగా కనిపిస్తున్నాయి. అయితే అంచనాల ప్రకారం ప్రతిపక్ష కూటమికి 54 సీట్లు, నెతన్యాహు మితవాద కూటమికి 50 సీట్లు, అరబ్ నేతృత్వంలోని పార్టీలకు 16 సీట్లు లభించవచ్చని తెలుస్తోంది. మరొక ప్రముఖ మీడియా ఛానల్ 12 సర్వే ప్రకారం ప్రతిపక్షానికి 56, నెతన్యాహు కూటమికి 50, అరబ్ పార్టీలకు 14 సీట్లు వస్తాయని తెలిసింది. ఈ లెక్కన నెతన్యాహు కూటమి కంటే ప్రతిపక్షానికే కాస్త మెరుగైన సీట్లు వస్తున్నప్పటికీ, ప్రభుత్వాన్ని ఏర్పాటు చేసేంత స్పష్టమైన మెజారిటీ మాత్రం ఎవరికీ రాకపోవచ్చని నిపుణులు భావిస్తున్నారు.

Also Read : హర్మూజ్‌లో దాడులు.. దెబ్బతిన్న 30 సూపర్‌ ట్యాంకర్లు.. సంక్షోభంలో చమురు రవాణా!

ఇజ్రాయెల్‌లో అమలులో ఉన్న ప్రత్యేక ప్రాతినిధ్య ఎన్నికల విధానం ప్రకారం.. కేవలం ఒక పెద్ద పార్టీ విజయం సాధించినంత మాత్రాన నేరుగా ప్రభుత్వం ఏర్పడదు. పార్లమెంట్‌లో కనీసం 61 మంది సభ్యుల మద్దతు ఉన్న నాయకుడే ప్రధానిగా బాధ్యతలు చేపడతారు. ఈ క్రమంలోనే చిన్న చిన్న ప్రాంతీయ, మతపరమైన పార్టీలు తుది ఫలితాల్లో అత్యంత కీలక పాత్ర పోషించే అవకాశముంది. ప్రస్తుతం నెతన్యాహు తన లికుడ్ పార్టీతో పాటు తీవ్ర కుడిపక్ష నాయకుడు ఇటామర్ బెన్-గ్విర్, షాస్, యునైటెడ్ టోరా జుడాయిజం వంటి మత విశ్వాసాల ఆధారిత పార్టీల మద్దతుపైనే పూర్తిగా ఆధారపడ్డారు.

మరోవైపు ప్రతిపక్షంలో మాజీ సైనిక అధిపతి గాడి ఐసెన్‌కోట్ స్థాపించిన యషార్ పార్టీ ఈసారి నెతన్యాహుకు ప్రధాన ముప్పుగా పరిణమించింది. అక్టోబర్ 7 నాటి భద్రతా వైఫల్యాలు, ప్రభుత్వ నిర్లక్ష్యాన్ని ఐసెన్‌కోట్ తీవ్రంగా ఎండగడుతూ ప్రజల్లోకి వెళ్లారు. ఆయనతో పాటు మాజీ ప్రధాని నఫ్తాలి బెన్నెట్, ప్రతిపక్ష నేత యైర్ లాపిడ్‌లు సైతం చేతులు కలిపి బలమైన కూటమిగా రేసులో నిలిచారు. పారదర్శకమైన పాలన, జవాబుదారీతనం, మిలిటరీ సేవల్లో అందరికీ సమాన బాధ్యతలు కల్పించడం వంటి హామీలతో వీరు ఓటర్లను ఆకట్టుకుంటున్నారు.

ఈ ఎన్నికల్లో ప్రధానంగా అక్టోబర్ 7 దాడి తాలూకు భద్రతా వైఫల్యాలు, గాజా యుద్ధ భవిష్యత్తు, హమాస్ బందీల విడుదల, పెరిగిన జీవన వ్యయం వంటి అంశాలు ఓటింగ్‌ను ప్రభావితం చేయనున్నాయి. దీనితో పాటు అతి-ఆర్థడాక్స్ మతస్థులకు సైనిక సేవ నుండి మినహాయింపు ఇవ్వడాన్ని వ్యతిరేకిస్తూ సామాన్య ప్రజల్లో వ్యక్తమవుతున్న అసంతృప్తి కూడా నెతన్యాహుకు ప్రతికూలంగా మారింది. ఇక ఏ ప్రధాన కూటమికి పూర్తి మెజారిటీ రాని పక్షంలో మన్సూర్ అబ్బాస్ నేతృత్వంలోని అరబ్ పార్టీలు కింగ్‌మేకర్‌గా మారి ప్రభుత్వాన్ని శాసించే అవకాశాలు ఉన్నాయి. పోలింగ్ పూర్తయిన వెంటనే ఎగ్జిట్ పోల్స్ వెలువడనుండగా.. అనంతరం ఓట్ల లెక్కింపు ప్రక్రియ జరగనుంది. ఒకవేళ ఇరు వర్గాలు పొత్తుల విషయంలో ఏకాభిప్రాయానికి రాకపోతే ఇజ్రాయెల్‌లో మరోసారి తీవ్ర రాజకీయ అనిశ్చితి ఏర్పడి.. మళ్లీ ఎన్నికల దిశగా వెళ్లే అవకాశం ఉంది.

Also Read : రంగంలోకి మెలానియా ట్రంప్.. ఉక్రెయిన్ యుద్ధంలో సంచలన పరిణామం.. పుతిన్-జెలెన్స్కీలను ఎలా ఒప్పించారు?