
ఇజ్రాయెల్ పార్లమెంట్ ఎన్నికల ఫలితాలు ఆ దేశ రాజకీయ చరిత్రలోనే మునుపెన్నడూ లేని విధంగా ఉత్కంఠభరితమైన సస్పెన్స్ను తెరపైకి తెచ్చాయి. మొత్తం 120 స్థానాలు ఉన్న పార్లమెంటులో ఏ ఒక్క పార్టీకి కానీ, కూటమికి కానీ ప్రభుత్వాన్ని ఏర్పాటు చేయడానికి కావాల్సిన 61 స్థానాల మెజారిటీ లభించలేదు. దాదాపు 90 శాతం ఓట్ల లెక్కింపు పూర్తయ్యేసరికి.. ప్రస్తుత ప్రధాని బెంజమిన్ నెతన్యాహు(Benjamin Netanyahu) నేతృత్వంలోని మితవాద కూటమి 53 సీట్లు సాధించగా.. మాజీ సైన్యాధిపతి గాడి ఐసెన్కోట్ నేతృత్వంలోని ప్రతిపక్ష కూటమి 48 సీట్లకు పరిమితమైంది.
అయితే ఈ ఎన్నికల్లో అందరినీ ఆశ్చర్యపరుస్తూ అరబ్ వర్గానికి చెందిన రెండు ప్రధాన పార్టీలు రికార్డు స్థాయిలో 19 స్థానాల్లో విజయం సాధించే దిశగా దూసుకుపోతున్నాయి. దీంతో ఇప్పుడు ఇజ్రాయెల్ రాజ్యాధికారం ఎవరికి దక్కాలనేది పూర్తిగా ఈ అరబ్ పార్టీల చేతుల్లోనే చిక్కుకుంది. వీరిని ప్రసన్నం చేసుకోకుండా లేదా వారి మద్దతు తీసుకోకుండా కొత్త ప్రభుత్వం కొలువు తీరడం అసాధ్యంగా మారింది.
ఒకవైపు అధికారానికి అరబ్ పార్టీలే కీలకంగా మారగా.. మరోవైపు నెతన్యాహుకు చెందిన లికుడ్ పార్టీ వారిపై తీవ్ర ఆగ్రహం వ్యక్తం చేస్తోంది. అరబ్ పార్టీలు ఎన్నికలను హైజాక్ చేశాయని.. దొంగ బ్యాలెట్లతో పెద్ద ఎత్తున అవకతవకలకు పాల్పడ్డాయని తీవ్ర ఆరోపణలు చేసింది. ఉగ్రవాదానికి, యూదు రాజ్య నాశనానికి మద్దతు ఇచ్చే అరబ్ పార్టీలు బెదిరింపులు, లంచాలు, నిషేధిత సాఫ్ట్వేర్ సహాయంతో ఓటింగ్ శాతాన్ని పెంచుకుని ఎన్నికలను దొంగిలించాయని లికుడ్ పార్టీ ప్రకటన విడుదల చేసింది. అయితే ఈ ఆరోపణలకు సంబంధించి ఎలాంటి ఆధారాలను బహిరంగంగా ప్రదర్శించలేదు. నెతన్యాహు తాను ఓటు దొంగలు అని నిందించిన వారితోనే చేతులు కలుపుతారా లేదా అనే సస్పెన్స్ ఇప్పుడు సర్వత్రా నెలకొంది.
Also Read : సొంత జనరల్స్పైనే ట్రంప్ వేటు.. ఇరాన్పై దాడికి ముందు.. అసలు కారణమేంటి?
ఇజ్రాయెల్లో ప్రభుత్వం ఏర్పాటుకు ఉన్న 4 ప్రధాన మార్గాలు ఉన్నాయి.
నెతన్యాహు – ఐసెన్కోట్ పొత్తు
దేశంలో ఏర్పడిన రాజకీయ సంక్షోభాన్ని నివారించడానికి నెతన్యాహు, తన ప్రధాన ప్రత్యర్థి ఐసెన్కోట్ను ఒప్పించి ‘జాతీయ ఐక్యతా ప్రభుత్వం’ ఏర్పాటు చేయడం మొదటి మార్గం. కానీ ఇది జరిగే అవకాశాలు దాదాపు శూన్యం. ఎందుకంటే ఐసెన్కోట్ ఎన్నికల ప్రచారమంతా నెతన్యాహును అధికారం నుంచి తొలగించడమే ప్రధాన లక్ష్యంగా సాగింది. నెతన్యాహు తన అబద్ధాల రాజకీయాలతో, సమాజంలో విద్వేషం నింపుతున్నారని, ఆయన తక్షణమే రాజకీయ విరమణ చేయాలని ఐసెన్కోట్ బహిరంగంగానే సవాలు విసిరారు.
అరబ్ పార్టీల మద్దతుతో ప్రతిపక్ష ప్రభుత్వం
ఐసెన్కోట్ నేతృత్వంలోని ప్రతిపక్ష కూటమి అరబ్ పార్టీలతో కలిసి ప్రభుత్వాన్ని ఏర్పాటు చేయడం రెండవ మార్గం. ఇది కనుక సాకారమైతే ఇజ్రాయెల్ చరిత్రలోనే అతిపెద్ద రాజకీయ మార్పు అవుతుంది. 7 సీట్లు గెలుస్తుందని అంచనా వేస్తున్న మన్సూర్ అబ్బాస్ నేతృత్వంలోని ‘రామ్’ పార్టీ ప్రతిపక్ష ప్రభుత్వంలో చేరేందుకు సిద్ధంగా ఉంది. అలాగే 12 సీట్లు సాధించనున్న ‘జాయింట్ లిస్ట్’ పార్టీ బయటి నుంచి మద్దతు ఇస్తామని తెలిపింది. అయితే సంప్రదాయ యూదు పార్టీలు అరబ్ నేతలతో నేరుగా చేతులు కలపడానికి వెనుకాడటమే ఇక్కడ అతిపెద్ద అడ్డంకి.
ప్రతిపక్ష కూటమిని విచ్ఛిన్నం చేయడం
చతురత కలిగిన నెతన్యాహు, ప్రతిపక్ష కూటమిలోని మితవాద నేతలను తనవైపు తిప్పుకోవడం మూడో మార్గం. ఐసెన్కోట్ కూటమిలో ఉన్న ‘బయాచాద్’ నేత నఫ్తాలి బెన్నెట్, ‘యిస్రాయెల్ బీటెను’ నేత అవిగ్డోర్ లీబర్మాన్లు భద్రతా విషయాల్లో నెతన్యాహు ఆలోచనలతో ఏకీభవిస్తారు. వీరిని తన వైపు తిప్పుకోగలిగితే నెతన్యాహు చాలా సులువుగా 61 సీట్ల మెజారిటీ మార్కును చేరుకుని మళ్లీ ప్రధానమంత్రి పీఠాన్ని అధిరోహించవచ్చు.
Also Read : ఇక ‘AI’ కాదు.. ‘SI’! ఆర్టిఫిషియల్ ఇంటెలిజెన్స్ పేరు మార్చిన ట్రంప్
కొత్తగా ఎన్నికలకు వెళ్లడం
పైన పేర్కొన్న ఏ ఒక్క మార్గంలోనూ ఒప్పందం కుదరకపోతే ఇజ్రాయెల్ ప్రజలు మళ్లీ ఎన్నికల బరిలోకి దిగాల్సి వస్తుంది. ఒకవేళ తిరిగి ఎన్నికలు జరిగితే అది నెతన్యాహుకే లబ్ధి చేకూరుస్తుందని విశ్లేషకులు భావిస్తున్నారు. కొత్త ప్రభుత్వం ఏర్పడేంత వరకు ఆయనే తాత్కాలిక ప్రధానిగా కొనసాగుతారు. పైగా తదుపరి ఎన్నికల్లో స్పష్టమైన మెజారిటీ సాధించవచ్చనే ధీమా కూడా ఆయనలో ఉంది.









