NVIDIA CEO Jensen Huang’s
NVIDIA CEO Jensen Huang’s

ప్రపంచంలోనే అతిపెద్ద టెక్నాలజీ కంపెనీల్లో ఒకటి ఎన్వీడియా. ఆ కంపెనీ బాస్ జెన్సెన్ హువాంగ్ ఇప్పుడు ఓ మహిళతో ఉన్న సంబంధం కారణంగా వార్తల్లో నిలిచారు. ఆ మహిళ చైనా గూఢఛారిగా పనిచేస్తోందన్న అనుమానాలతో అమెరికా ఎఫ్‌బీఐ రంగంలోకి దిగింది. ఏకంగా అమెరికా అధ్యక్షుడు డొనాల్డ్ ట్రంప్ కూడా ఈ వ్యవహారంపై మాట్లాడారు. జెన్సెన్ హువాంగ్ ఆందోళన పడాల్సిన అవసరం లేదని, ఆయన ఈ సమస్య నుంచి బయటపడతారన్నారు. ఇంతకీ ప్రపంచ టెక్నాలజీ రంగంలో ఎంతో పేరున్న జెన్సెన్ హువాంగ్‌తో సన్నిహితంగా ఉన్న ఆ మహిళ ఎవరు? ఆమె గతమేంటి? చైనా గూఢచారి అనే అనుమానాలు ఎందుకొచ్చాయి? అమెరికా ప్రభుత్వం ఈ వ్యవహారాన్ని అంత సీరియస్‌గా ఎందుకు తీసుకుంటోంది?

ముందుగా ఈ స్టోరీలోకి వెళ్లేముందు జెన్సెన్ హువాంగ్ గురించి తెలుసుకోవాలి. ఆయన వయసు 63 ఏళ్లు. తైవాన్‌లో పుట్టి అమెరికాలో పెరిగారు. 1993లో మరో ఇద్దరితో కలిసి ఎన్వీడియా కంపెనీ ప్రారంభించారు. మొదట్లో కంప్యూటర్ గేమ్స్‌కు ఉపయోగపడే గ్రాఫిక్స్ చిప్స్ తయారు చేసిన ఎన్విడియా కంపెనీ.. ఇప్పుడు ప్రపంచ ఏఐ రంగంలో తిరుగులేని స్థాయికి చేరుకుంది. చాట్‌జీపీటీ లాంటి ఏఐ టెక్నాలజీ పనిచేయాలంటే భారీ కంప్యూటింగ్ పవర్ కావాలి. దానికి అవసరమైన చిప్స్ తయారీలో ఎన్వీడియాదే పైచేయి. అందుకే మైక్రోసాఫ్ట్, గూగుల్, మెటా లాంటి పెద్ద కంపెనీలు ఎన్వీడియా చిప్స్ కోసం వేల కోట్ల రూపాయలు ఖర్చు చేస్తున్నాయి. అలాంటి కంపెనీని మూడు దశాబ్దాలకు పైగా నడిపిస్తున్న జెన్సెన్ హువాంగ్ ఇప్పుడు ఊహించని వివాదంలో చిక్కుకున్నారు.

ఈ వివాదంలో మార్మోగుతున్న మహిళ పేరు ఆలిస్ హువాంగ్. ఆమె అసలు పేరు హువాంగ్ లీ అని అమెరికా మీడియా చెబుతోంది. ఆమె వయసు 43 ఏళ్లు. చైనా సిటిజన్. ఆలిస్ గతం గురించి చూస్తే ఆసక్తికరమైన విషయాలు కనిపిస్తున్నాయి. ఆమె మొదట చైనా ప్రభుత్వ టెలివిజన్ సంస్థలో జర్నలిస్టుగా పనిచేసింది. ఆ తర్వాత ఫైనాన్స్ రంగంలోకి వెళ్లింది. హెచ్ఎస్‌బీసీ, సిటిక్ సెక్యూరిటీస్ లాంటి పెద్ద సంస్థల్లో పనిచేసిన అనుభవం ఉంది. అలా… నాలుగేళ్లు మీడియాలో, ఎనిమిదేళ్లు ఫైనాన్స్ రంగంలో పనిచేసింది.

Also Read : ఎన్విడియాకు భారీ షాక్.. సీఈఓ జెన్సన్ హువాంగ్‌పై వివాదాస్పద ఆరోపణలతోరూ.23 లక్షల కోట్లు స్వాహా!

ఆలిస్‌కు ఇంగ్లీష్ బాగా వచ్చు. బిజినెస్ బిగ్‌షాట్స్‌తో పరిచయాలు ఉన్నాయి. టెక్నాలజీ కంపెనీల సమావేశాలు, వ్యాపారవేత్తల విందుల్లో ఆమె కనిపించేదని అమెరికా మీడియా చెబుతోంది. ఏఐ రంగంలోని ప్రముఖులతో కూడా ఆమెకు పరిచయాలు ఉన్నాయి. ఒకప్పుడు జర్నలిస్టుగా పనిచేసిన ఆలిస్.. ఆ తర్వాత ఫైనాన్స్ రంగంలోకి వెళ్లి, అక్కడి నుంచి ప్రపంచ టెక్నాలజీ రంగంలోని పెద్ద వ్యక్తులతో పరిచయాలు పెంచుకుంది. అయితే ఆమె చైనా కోసం గూఢచర్యం చేశారన్న ఆరోపణ ఇప్పటివరకు రుజువు కాలేదు.

మరి, ఎన్విడియా కంపెనీ సీఈవో జెన్సెన్ హువాంగ్‌తో ఆమెకు పరిచయం ఎలా ఏర్పడింది? ఇద్దరి మధ్య సంబంధం ఎప్పుడు మొదలైంది? ఈ విషయాల్లో పూర్తి వివరాలు బయటకు రాలేదు. అయితే రెండేళ్ల క్రితమే ఇద్దరూ సన్నిహితంగా ఉన్నారని అమెరికా మీడియాలో కథనాలు వచ్చాయి. 2024 జూన్‌లో తైవాన్ రాజధాని తైపీలోని ఓ బార్‌లో ఇద్దరూ కలిసి ఉన్న ఫొటో బయటపడింది. 2025 మేలో తైపీలో జరిగిన టెక్నాలజీ కార్యక్రమంలో కూడా ఇద్దరూ కలిసి కనిపించారు. విందులు, గోల్ఫ్ రిసార్టులు, ఇతర కార్యక్రమాల్లో ఇద్దరూ కలిసి ఉన్న ఫొటోల గురించి కూడా CNN రిపోర్ట్ చేసింది.

అయితే ఈ వ్యవహారంలో బిగ్‌ డిబేట్‌కు దారితీసిన విషయం ఆలిస్‌కు ఉన్న వ్యాపార సంబంధాలు. ముఖ్యంగా సింగపూర్ కేంద్రంగా పనిచేసే మెగాస్పీడ్ ఇంటర్నేషనల్ కంపెనీతో ఆమెకు ఉన్న సంబంధం. ఈ కంపెనీ క్లౌడ్ కంప్యూటింగ్, డేటా సెంటర్ల వ్యాపారం చేస్తోంది. 2015లో చైనాకు చెందిన వీడియో గేమ్స్ వ్యాపారంతో సంబంధం ఉన్న సంస్థగా మొదలై, ఆ తర్వాత మెగాస్పీడ్ పేరుతో కార్యకలాపాలు సాగించింది. 2023 మార్చి నుంచి నవంబర్ వరకు ఆలిస్ ఈ కంపెనీలో డైరెక్టర్‌గా ఉన్నట్లు సింగపూర్ కంపెనీ రికార్డులు చెబుతున్నాయి.

ఇక్కడ మరో పెద్ద విషయం ఉంది. మెగాస్పీడ్ కంపెనీ ఆసియాలో ఎన్వీడియా చిప్స్ కొనుగోలు చేసే పెద్ద సంస్థల్లో ఒకటిగా ఎదిగింది. నాలుగు బిలియన్ డాలర్లకు పైగా విలువైన ఎన్వీడియా చిప్స్ కొనుగోలు చేసింది. మన కరెన్సీలో చెప్పాలంటే దాదాపు 35 వేల కోట్ల రూపాయల పైమాటే. ఇంత పెద్ద మొత్తంలో చిప్స్ కొనుగోలు చేసే మెగాస్పీడ్ కంపెనీలో డైరెక్టర్‌గా పనిచేసిన మహిళకు.. ఆ చిప్స్ తయారు చేసే ఎన్వీడియా కంపెనీ బాస్‌తో సన్నిహిత సంబంధం ఉండటం ఇప్పుడు అమెరికాలో చర్చకు దారితీసింది.

అసలు చిప్స్ విషయంలో అమెరికా ఎందుకంత జాగ్రత్తగా ఉంటోంది? దీనికి కారణం అమెరికా, చైనా మధ్య నడుస్తున్న టెక్నాలజీ పోటీ. ప్రస్తుతం రెండు దేశాలు ఏఐ రంగంలో ఒకదానికొకటి గట్టి పోటీ ఇస్తున్నాయి. ఏఐ టెక్నాలజీని కేవలం కంప్యూటర్లు, మొబైల్ ఫోన్ల కోసమే వాడటం లేదు. సైన్యం, ఆయుధాల తయారీ, రక్షణ వ్యవస్థలు, పెద్ద మొత్తంలో సమాచారాన్ని పరిశీలించడం లాంటి పనుల్లో కూడా ఉపయోగిస్తున్నారు. అందుకే అత్యంత శక్తివంతమైన ఏఐ చిప్స్ చైనా చేతికి వెళ్లకుండా అమెరికా కొన్ని ఆంక్షలు పెట్టింది.

కానీ అమెరికా నేరుగా చైనాకు అమ్మకూడదని చెప్పిన చిప్స్.. ఇతర దేశాల్లోని కంపెనీల ద్వారా చైనాకు చేరితే ఆ ఆంక్షలకు అర్థమే ఉండదు. మెగాస్పీడ్ ద్వారా అలాంటి చిప్స్ చైనా కంపెనీలకు అందాయా అనే కోణంలో అమెరికా అధికారులు విచారణ చేస్తున్నారు. అయితే మెగాస్పీడ్ తాము ఎలాంటి తప్పు చేయలేదని చెబుతోంది. నిబంధనలకు లోబడే వ్యాపారం చేస్తున్నామని అంటోంది. ఆలిస్‌కు గతంలో మెగాస్పీడ్‌ కంపెనీతో ఉన్న సంబంధం, జెన్సెన్ హువాంగ్‌తో ఆమె సన్నిహితంగా ఉండటం.. ఈ రెండు విషయాలను అమెరికా అధికారులు నిశితంగా పరిశీలిస్తున్నారు.

అమెరికా నిఘా అధికారులు ఆలిస్ కదలికలను కొంతకాలంగా గమనిస్తూ వచ్చారు. చైనా కోసం ఆమె సమాచారం సేకరిస్తుందనే అనుమానాలు ఏడాది క్రితమే అధికారుల దృష్టికి వచ్చినట్లు CNN తెలిపింది. న్యూయార్క్ టైమ్స్ కథనం ప్రకారం ఆమెపై ఎలక్ట్రానిక్ నిఘా కూడా పెట్టారు. ఈ వ్యవహారం గురించి అమెరికా అధ్యక్షుడు ట్రంప్‌కు గతంలోనే సమాచారం అందింది. అయితే ఆలిస్‌కు ఎన్వీడియా కంపెనీ నుంచి ఏదైనా రహస్య సమాచారం అందిందా? ఆ సమాచారాన్ని చైనాకు పంపించారా? అనే విషయాల్లో ఇప్పటివరకు ఆధారాలు బయటకు రాలేదు.

ఇంతలో నవంబర్ 8న ఈ వ్యవహారం మరో మలుపు తిరిగింది. తామే స్వయంగా విచారణ చేపడుతున్నట్లు ఎన్వీడియా కంపెనీ బోర్డు ప్రకటించింది. విదేశీ నిఘా వర్గాలు జెన్సెన్ హువాంగ్‌ను లక్ష్యంగా చేసుకున్నాయా? ఆయనతో ఉన్న వ్యక్తిగత సంబంధాన్ని ఉపయోగించుకుని కంపెనీ సమాచారం తెలుసుకోవడానికి ప్రయత్నించాయా? అనే విషయాలను తేల్చేందుకు బయట నుంచి న్యాయ నిపుణుల సహాయం కూడా తీసుకుంటోంది.

ఇదే సమయంలో జెన్సెన్ హువాంగ్ తన వ్యక్తిగత జీవితంలో చేసిన తప్పును ఒప్పుకున్నారు. తన భార్యకు నమ్మకద్రోహం చేసినట్లు ఎన్వీడియా ఉద్యోగులకు పంపిన లేఖలో ప్రస్తావించారు. తన ప్రవర్తనకు తానే బాధ్యత వహిస్తానని తెలిపారు. భార్యకు, కుటుంబానికి, కంపెనీకి క్షమాపణ చెప్పారు. విచారణకు పూర్తిగా సహకరిస్తానని హామీ ఇచ్చారు. అయితే ఆలిస్ చైనా కోసం పనిచేస్తున్నారనే విషయం తనకు తెలియదని ఆయన చెప్పినట్లు ట్రంప్ వెల్లడించారు.

Also Read : కిమ్‌ వారసురాలిగా ఆమెనేనా? ఉత్తర కొరియాలో నాలుగో తరం సిద్ధం!

జెన్సెన్ హువాంగ్ భార్య పేరు లోరీ హువాంగ్. ఇద్దరూ చదువుకునే రోజుల్లోనే పరిచయమయ్యారు. చాలా ఏళ్లుగా కలిసి ఉంటున్నారు. వారికి ఇద్దరు పిల్లలు. కూతురు మాడిసన్, కొడుకు స్పెన్సర్. ఇద్దరూ ఎన్వీడియా కంపెనీలోనే పనిచేస్తున్నారు. ప్రపంచంలో ఎంతో పేరు సంపాదించుకున్న జెన్సెన్ హువాంగ్.. ఇప్పుడు తన వ్యక్తిగత జీవితంలో జరిగిన వ్యవహారంపై కుటుంబానికి, ఉద్యోగులకు వివరణ ఇచ్చుకోవాల్సిన దుస్థితి ఏర్పడింది.

ఇక అమెరికా అధ్యక్షుడు ట్రంప్ చేసిన వ్యాఖ్యలు ఈ కథలో మరో కీలకమైన విషయం. నవంబర్ 9న వైట్‌హౌస్‌లో మీడియాతో మాట్లాడిన ట్రంప్.. ఎఫ్‌బీఐ ఎంక్వైరీ కొనసాగుతోందని చెప్పారు. అయితే జెన్సెన్ హువాంగ్ కలవరపడాల్సిన అవసరం లేదన్నారు. ఆయన ఈ వివాదం నుంచి బయటపడతారనే నమ్మకం తనకు ఉందన్నారు. తాను జెన్సెన్‌తో ఫోన్‌లో మాట్లాడినట్లు కూడా వెల్లడించారు.

ఆ మహిళ చైనా గూఢచారి అనే విషయం నీకు తెలుసా అని జెన్సెన్‌ను అడిగితే.. తనకు అసలు తెలియదని చెప్పినట్లు ట్రంప్ వివరించారు. ఆయన మాటలను తాను నమ్ముతున్నానని అన్నారు. జెన్సెన్ మంచి వ్యక్తి అని, అమెరికాలో గొప్ప కంపెనీని నిర్మించారని ప్రశంసించారు. అయితే ట్రంప్ అండగా ఉన్నా కూడా ఎఫ్‌బీఐ ఎంక్వైరీలో ఏం తేలబోతుందని అన్నదే ఇప్పుడు ఆసక్తిగా మారింది.

మరోవైపు చైనా కూడా ఈ వ్యవహారంపై స్పందించింది. ఆలిస్ తమ గూఢఛారి కాదని చైనా విదేశాంగ శాఖ కొట్టిపారేసింది. తమ దేశాన్ని చెడ్డగా చూపించేందుకే ఇలాంటి కథనాలు అని మండిపడింది. ఆలిస్ మాత్రం ఈ ఆరోపణలపై ఇప్పటిదాకా ఎలాంటి వివరణ ఇవ్వలేదు. ఆమె ప్రస్తుతం ఎక్కడ ఉన్నారన్న విషయంపై కూడా క్లారిటీ లేదు.

మొత్తానికి ఈ వివాదం ఎన్వీడియా కంపెనీ వ్యాపారంపైనా ఎఫెక్ట్ చూపించింది. నవంబర్ 9న కంపెనీ షేర్లు 4శాతానికి పైగా పడిపోయాయి. జెన్సెన్ హువాంగ్ ఎన్వీడియా కంపెనీకి ఎంత ముఖ్యమో అందరికీ తెలుసు. ఆయన కేవలం కంపెనీని నడిపించే వ్యక్తి మాత్రమే కాదు. ఆ కంపెనీ ఈ స్థాయికి ఎదగడానికి ప్రధాన కారణం. అలాంటి వ్యక్తి చుట్టూ వివాదం మొదలవడంతో ఇన్వెస్టర్లలో కూడా ఆందోళన కనిపించింది.

ఈ వ్యవహారంపై సెనేట్‌లోనూ అగ్గిరాజుకుంది. అమెరికా భద్రతకు ఏమైనా ముప్పు ఏర్పడిందా? కీలకమైన చిప్స్ టెక్నాలజీ సమాచారం చైనాకు చేరిందా? అనే విషయాలపై పూర్తి వివరాలు ఇవ్వాలని డెమోక్రటిక్ నేతలు డిమాండ్‌ చేస్తున్నారు.

ఇప్పుడు ఈ మొత్తం వ్యవహారంలో తేలాల్సిన విషయాలు మూడు. ఆలిస్ నిజంగానే చైనా నిఘా వర్గాల కోసం పనిచేశారా? జెన్సెన్ హువాంగ్‌తో ఉన్న పరిచయం ద్వారా ఎన్వీడియా కంపెనీకి సంబంధించిన సమాచారం ఏమైనా సేకరించారా? అమెరికా ఆంక్షలు ఉన్న చిప్స్ చైనాకు చేరడంలో ఆమె పాత్ర ఏమైనా ఉందా? ఈ విషయాల్లో నిజానిజాలు బయటపడితేనే అసలు కథ ఏంటో తెలుస్తుంది.

ఒకవైపు ప్రపంచ ఏఐ రంగంలో అగ్రస్థానంలో ఉన్న ఎన్వీడియా. మరోవైపు అమెరికా, చైనా మధ్య నడుస్తున్న టెక్నాలజీ పోటీ. వీటి మధ్యలో ప్రపంచంలోనే అత్యంత పేరున్న కంపెనీ బాస్ వ్యక్తిగత వ్యవహారం. ఇప్పుడు ఈ మూడు ఒకే చోట కలవడంతో ఈ కథ ప్రపంచవ్యాప్తంగా చర్చకు దారితీసింది.