అమెరికాలో అక్రమ వలసదారులపై అధ్యక్షుడు డొనాల్డ్ ట్రంప్ ప్రభుత్వం చేపట్టిన ఉక్కుపాదం చర్యలు చారిత్రాత్మక గరిష్ట స్థాయికి చేరుకున్నాయి. 2026 ఆర్థిక సంవత్సరంలో అమెరికా ఇమ్మిగ్రేషన్ అండ్ కస్టమ్స్ ఎన్‌ఫోర్స్‌మెంట్ సంస్థ ఏకంగా 4,83,200 మందిని దేశ బహిష్కరణ చేసినట్లు హోంల్యాండ్ సెక్యూరిటీ విభాగం తాజాగా అధికారికంగా ప్రకటించింది. అంతేకాకుండా ఇదే కాలంలో 4,91,000 మందికి పైగా వలసదారులను అరెస్టు చేసినట్లు వెల్లడించింది. ICE సంస్థ ఏర్పడిన 23 ఏళ్ల సుదీర్ఘ చరిత్రలో ఇంత భారీ స్థాయిలో బహిష్కరణలు, అరెస్టులు జరగడం ఇదే తొలిసారి కావడం గమనార్హం. 2025లో నమోదైన 4,42,640 బహిష్కరణల రికార్డును ఈ ఏడాది గణాంకాలు పూర్తిగా బద్దలు కొట్టాయి.

హోంల్యాండ్ సెక్యూరిటీ సెక్రటరీ మార్క్‌వేన్ ముల్లిన్ ఈ గణాంకాలను విడుదల చేస్తూ.. 2026 ఆర్థిక సంవత్సరం ICE చరిత్రలోనే అత్యంత కీలకమైనదిగా నిలిచిందని పేర్కొన్నారు. ముఖ్యంగా గత సెప్టెంబర్ నెలలో 48,000 మందికి పైగా అరెస్టులు జరిగాయని.. అంతకుముందు ఆగస్టు నెలలో ఈ సంఖ్య 50,925గా నమోదైందని అధికారులు తెలిపారు. ట్రంప్ పరిపాలనలో నిఘా వ్యవస్థను అత్యంత కఠినతరం చేయడం వల్ల అరెస్టులకు భయపడి చాలా మంది అక్రమ వలసదారులు స్వచ్ఛందంగానే అమెరికాను విడిచి తమ స్వదేశాలకు వెళ్లిపోతున్నారని సెంటర్ ఫర్ ఇమ్మిగ్రేషన్ స్టడీస్ డైరెక్టర్ స్టీవెన్ కామరోటా అభిప్రాయపడ్డారు. అయితే ప్రభుత్వం విడుదల చేసిన ఈ అంకెలలో ఎంత మందిని దేశం లోపల పట్టుకుని పంపించారు. ఎంత మందిని సరిహద్దులు లేదా విమానాశ్రయాల నుంచే వెనక్కి పంపారనే విషయంలో పూర్తి స్పష్టత లేదని ఆయన పేర్కొన్నారు.

Also Read : ట్రంప్‌కు ఇరాన్ మాస్టర్ షాక్.. భూగర్భంలో అదృశ్య క్షిపణుల సామ్రాజ్యం.. అసలు ప్లాన్ ఏంటి?

మరోవైపు తన ప్రభుత్వం అనుసరిస్తున్న వలస విధానాలు కొన్ని సందర్భాల్లో మరీ కఠినంగా ఉండవచ్చని అధ్యక్షుడు డొనాల్డ్ ట్రంప్ ఇటీవల అంగీకరించడం విశేషం. సీబీఎస్ ‘60 మినిట్స్’ కార్యక్రమానికి ఇచ్చిన ఇంటర్వ్యూలో ఆయన మాట్లాడుతూ దేశం నుంచి నేరస్థులను, చెడ్డవారిని బయటకు పంపడంలో తనకు మంచి పేరు వచ్చిందని.. అయితే మంచి ఉద్యోగాలు చేసుకుంటూ స్థిరపడిన వారిని కూడా బహిష్కరించాల్సి రావడం తనకు కొంత బాధ కలిగించిందని అన్నారు. అయినప్పటికీ దేశంలోకి అక్రమంగా ప్రవేశించడం చట్ట ఉల్లంఘనేనని ఆయన తన చర్యలను సమర్థించుకున్నారు. కాగా ఈ కఠిన చర్యల వల్ల ట్రంప్ వలస విధానాలపై ప్రజల్లో ఆమోద రేటింగ్ ప్రారంభంలో ఉన్న 50 శాతం నుంచి 38 శాతానికి పడిపోయినట్లు తాజా సర్వేలు చెబుతున్నాయి.

ట్రంప్ ప్రభుత్వం అనుసరిస్తున్న ఈ దూకుడు వైఖరిపై ప్రతిపక్ష డెమోక్రటిక్ పార్టీ నేతలు తీవ్ర స్థాయిలో మండిపడుతున్నారు. వచ్చే ఏడాది అమెరికా కాంగ్రెస్‌లో తమ ఆధిపత్యం పెరిగిన వెంటనే ICE అనుసరిస్తున్న కఠిన వ్యూహాలపై సమగ్ర దర్యాప్తు జరిపిస్తామని డెమొక్రాట్లు హెచ్చరిస్తున్నారు. అమెరికన్లకు వ్యతిరేకంగా హోంల్యాండ్ సెక్యూరిటీ విభాగాన్ని ఒక ఆయుధంగా వాడుతున్నారని.. ఈ అదుపు తప్పిన విధానాలపై కచ్చితంగా విచారణ జరుపుతామని హౌస్ హోంల్యాండ్ సెక్యూరిటీ కమిటీ కాబోయే ఛైర్మన్ బెన్నీ థాంప్సన్ స్పష్టం చేశారు. కేవలం నేరస్థులపైనే బహిష్కరణ చర్యలు కేంద్రీకరించాలని.. సాధారణ వలసదారులకు చట్టబద్ధమైన హోదా కల్పించే మార్గాలను విస్తరించాలని డెమొక్రాట్లు డిమాండ్ చేస్తున్నారు.

ఇటీవల మిన్నియాపాలిస్‌లో ఫెడరల్ ఇమ్మిగ్రేషన్ ఏజెంట్ల దాడుల సమయంలో అలెక్స్ ప్రెట్టి, రెనీ నికోల్ గూడ్ అనే ఇద్దరు అమెరికా పౌరులు కాల్పుల్లో మరణించడం అంతర్జాతీయంగా తీవ్ర ఆగ్రహానికి దారితీసింది. ముసుగులు ధరించిన ఏజెంట్లు నిరసనకారులపై రసాయనాలు ప్రయోగించడం, పౌరులపై దాడులు చేయడానికి సంబంధించిన వీడియోలు సోషల్ మీడియాలో వైరల్ కావడంతో మానవ హక్కుల సంఘాలు భగ్గుమంటున్నాయి.

Also Read : ఏఐతో క్యాన్సర్‌కు చెక్.. మరో పదేళ్లలో వ్యాధులన్నీ మాయం!