
ఒక చిన్న రైలు ప్రమాదం దేశ రాజకీయాన్ని మార్చేస్తుందని.. విద్యార్థుల ఆగ్రహం దశాబ్దానికి పైగా సాగుతున్న పాలనను కూల్చేస్తుందని ఎవరూ ఊహించి ఉండరు. సెర్బియా దేశంలో సరిగ్గా ఇదే జరిగింది. అవినీతి, నిర్లక్ష్యానికి వ్యతిరేకంగా రోడ్డెక్కిన విద్యార్థుల ఉద్యమం అక్కడి 14 ఏళ్ల మితవాద ప్రభుత్వాన్ని మట్టికరిపించింది. తాజాగా జరిగిన పార్లమెంటరీ ఎన్నికల్లో విద్యార్థుల నేతృత్వంలోని స్టూడెంట్ లిస్ట్ పార్టీ సంచలన విజయం సాధించి అధికారాన్ని కైవసం చేసుకుంది.
ఈ మార్పుకు 2024లో జరిగిన ఓ విషాదకర సంఘటన కారణమని చెప్పవచ్చు. నోవి సాద్ రైల్వే స్టేషన్లో కాంక్రీట్ కప్పు కూలిపోయిన ప్రమాదంలో 16 మంది అమాయకులు ప్రాణాలు కోల్పోయారు. ఈ దుర్ఘటనకు ప్రభుత్వంలో ఉన్న తీవ్ర అవినీతి, నాసిరకం నిర్మాణాలే కారణమని ఆరోపిస్తూ విద్యార్థులు ఆగ్రహంతో వీధుల్లోకి వచ్చారు. 2000వ సంవత్సరంలో నియంత స్లోబోడాన్ మిలోసెవిక్ పతనం తర్వాత సెర్బియాలో నమోదైన అతిపెద్ద నిరసన ఉద్యమంగా ఇది చరిత్రకెక్కింది.
Also Read : హర్మూజ్లో దాడులు.. దెబ్బతిన్న 30 సూపర్ ట్యాంకర్లు.. సంక్షోభంలో చమురు రవాణా!
BREAKING NEWS: Students in Serbia have voted out their authoritarian leadership by winning the country’s parliamentary election.
They started with months of student protests against corruption and have translated street mobilisation into electoral legitimacy. https://t.co/b0FVXwKlFp
— Tapas Ranjan Nath (@nathtapas) October 26, 2026
సుదీర్ఘంగా దాదాపు రెండేళ్ల పాటు విద్యార్థులు ఈ పోరాటాన్ని ఆపకుండా ముందుకు తీసుకెళ్లారు. అధికార పార్టీ వద్ద ఉన్న భారీ మీడియా వ్యవస్థను ఎదుర్కొంటూ వారు నేరుగా ప్రజల్లోకే వెళ్లారు. దేశవ్యాప్తంగా భారీ ర్యాలీలు, ధర్నాలు నిర్వహించి ఓటర్లలో చైతన్యాన్ని నింపారు. ఫలితంగా రాజధాని బెల్గ్రేడ్లో జరిగిన చివరి ఎన్నికల ప్రచార సభకు ఏకంగా 1,50,000 మందికి పైగా ప్రజలు తరలివచ్చి విద్యార్థుల ఉద్యమానికి మద్దతు తెలిపారు.
ఈ ప్రజా ఉద్యమ తీవ్రత పెరగడంతో విద్యార్థులు స్టూడెంట్ లిస్ట్ పేరుతో సొంతంగా ఒక రాజకీయ పార్టీని ఏర్పాటు చేశారు. ఈ పార్టీ తరఫున పోటీ చేసిన 250 మంది అభ్యర్థులలో చాలామందికి ఎలాంటి పూర్వ రాజకీయ అనుభవం లేదు. వారంతా విద్య, వైద్యం, కళలు, సాంకేతిక వంటి వివిధ రంగాలలో నైపుణ్యం కలిగిన యువ నిపుణులు కావడం గమనార్హం. అవినీతి నిర్మూలన, నోవి సాద్ ప్రమాదంపై పారదర్శక విచారణ, ప్రజాస్వామ్య వ్యవస్థల పునరుద్ధరణే లక్ష్యంగా వారు ప్రజల ముందుకు వెళ్లారు.
దేశంలో పెల్లుబికిన నిరసనల ఒత్తిడి తట్టుకోలేక సుదీర్ఘకాలం సెర్బియాను పాలించిన మితవాద నాయకుడు అలెగ్జాండర్ వుసిచ్ గత నెలలో ముందస్తు ఎన్నికలను ప్రకటించారు. ప్రధానమంత్రి పదవికి పోటీ చేసేందుకు ఆయన తన అధ్యక్ష పదవికి కూడా రాజీనామా చేశారు. అయితే తాజాగా వెలువడిన ఎన్నికల ఫలితాల్లో ప్రతిపక్ష స్టూడెంట్ లిస్ట్ కూటమి మొత్తం 250 సీట్లకు గాను 135 నుంచి 140 స్థానాలను గెలుచుకుని స్పష్టమైన మెజారిటీ సాధించగా.. వుసిచ్కు చెందిన సెర్బియన్ ప్రోగ్రెసివ్ పార్టీ కేవలం 105 సీట్లకే పరిమితమై ఓటమిపాలైంది.
ఎన్నికల ఫలితాల అనంతరం అలెగ్జాండర్ వుసిచ్ ప్రజలను ఉద్దేశించి మాట్లాడుతూ తన ఓటమిని బహిరంగంగా అంగీకరించారు. అయితే రష్యా అధ్యక్షుడు వ్లాదిమిర్ పుతిన్కు అత్యంత సన్నిహితుడిగా పేరున్న వుసిచ్ తన ఓటమికి విదేశీ శక్తుల కుట్ర ఉందంటూ సంచలన ఆరోపణలు చేశారు. అమెరికాలోని ‘డీప్ స్టేట్’, అనేక యూరోపియన్ దేశాలు ప్రత్యక్షంగా వెనుకుండి నడిపిన విప్లవం వల్లనే తమ పార్టీ ఓడిపోయిందని ఆయన పేర్కొన్నారు. ఏది ఏమైనప్పటికీ ఒక రైలు ప్రమాదం రగిలించిన చిచ్చుతో ఉద్భవించిన విద్యార్థి ఉద్యమం నేడు సెర్బియాను ఏలే స్థాయికి ఎదగడం ప్రపంచ రాజకీయాల్లో అత్యంత అరుదైన మైలురాయిగా నిలిచింది.
Also Read : సైబర్ సెక్యూరిటీకి ఏఐ ముప్పు.. అమెరికా ఓటర్ల డేటాలోకి చొరబడ్డ క్లాడ్ చాట్బాట్!









