అమెరికా, ఇరాన్ దేశాల మధ్య గత కొంతకాలంగా తలెత్తిన తీవ్ర ఉద్రిక్తతలు, సైనిక చర్యల నేపథ్యంలో అమెరికా అధ్యక్షుడు డొనాల్డ్ ట్రంప్ అత్యంత కీలకమైన ప్రకటన చేశారు. ఇరాన్‌పై సైనికపరంగా తాము సాధించాల్సిన లక్ష్యాలు పూర్తయ్యాయని, ఇకపై ఆ దేశంతో యుద్ధం దాదాపు ముగిసినట్టేనని వ్యాఖ్యానించారు. అమెరికా రాజధాని వాషింగ్టన్‌లోని శ్వేతసౌధంలో ఖతార్ ప్రధాని మహమ్మద్ బిన్ అబ్దుల్ రహమాన్ అల్ థానీతో ట్రంప్ సుదీర్ఘంగా సమావేశమయ్యారు. ఈ ద్వైపాక్షిక చర్చలు ముగిసిన అనంతరం ఆయన విలేకరుల సమావేశంలో మాట్లాడారు.

Also Read : అగ్రరాజ్యంలో వణుకు పుట్టిస్తున్న ఇరాన్.. బంకర్లోకి అమెరికా ఆర్థిక మంత్రి.. అసలు ఏం జరుగుతోంది?

ప్రస్తుతానికి ఇరాన్‌పై తిరిగి బాంబు దాడులు జరిపే ఆలోచన లేదా ప్రణాళికలు అమెరికాకు లేవని ట్రంప్ స్పష్టం చేశారు. సైనికపరంగా ఇరాన్ తన సామర్థ్యాన్ని కోల్పోయిందని.. అందుకే ప్రస్తుతం ప్రాంతీయంగా ఉన్న యథాతథ స్థితిని మాత్రమే తాము కొనసాగిస్తున్నామని ఆయన వెల్లడించారు. అయితే అంతర్జాతీయంగా మారే పరిస్థితులను బట్టి తమ నిర్ణయాలు ఉంటాయని తెలిపారు. ఒకవేళ ఇరాన్ వైపు నుంచి ఏదైనా భద్రతా ముప్పు ఏర్పడినా లేదా పరిస్థితులు మారినా, తిరిగి దాడులు చేసేందుకు అమెరికా బలగాలు ఎల్లప్పుడూ సిద్ధంగా ఉంటాయని తీవ్ర స్థాయిలో హెచ్చరించారు.

అంతేకాకుండా టెహ్రాన్ చేపడుతున్న అణు కార్యక్రమాన్ని పూర్తిగా నిలిపివేసి దానిని నిర్వీర్యం చేయడమే తమ ప్రధాన లక్ష్యమని ట్రంప్ పేర్కొన్నారు. దీని కోసం ఒక బలమైన, శాశ్వతమైన దీర్ఘకాలిక పరిష్కారాన్ని కనుగొనేందుకు అమెరికా ప్రభుత్వం ప్రయత్నిస్తోందని ఆయన స్పష్టం చేశారు. అమెరికా అధ్యక్షుడు చేసిన వ్యాఖ్యలు, హెచ్చరికలపై ఇరాన్ కూడా తీవ్రంగానే స్పందించింది. పశ్చిమాసియా ప్రాంతంలో శాంతి నెలకొనాలన్నా, ప్రస్తుతం జరుగుతున్న ఘర్షణలు పూర్తిగా ముగియాలన్నా తాము ప్రతిపాదించిన ఏడు కీలక షరతులకు అమెరికా అంగీకరించి లొంగిపోవాలని ఇరాన్ స్పష్టం చేసింది. ఈ సుదీర్ఘ యుద్ధం వల్ల ఇరాన్ కంటే అమెరికా ప్రభుత్వమే ఆర్థికంగా, రాజకీయంగా తీవ్రంగా అతలాకుతలం అయిందని ఇరాన్ సుప్రీం జాతీయ భద్రతా మండలి కార్యదర్శి మొహ్సెన్ రెజాయీ ఒక ప్రకటన విడుదల చేస్తూ పేర్కొన్నారు.

అదే సమయంలో సమస్యల పరిష్కారానికి దౌత్యపరమైన మార్గాలు తెరచే ఉన్నాయని ఇరాన్ తెలిపింది. అమెరికాతో నేరుగా చర్చలు జరిపేందుకు తమ ప్రభుత్వం సిద్ధంగా ఉందని ఇరాన్ అధ్యక్షుడు పెజెష్కియన్‌ ప్రకటించారు. అయితే చర్చల పేరుతో తమపై ఎలాంటి ఒత్తిళ్లు తెచ్చినా, బెదిరింపులకు గురిచేసినా తమ దేశం ఎట్టి పరిస్థితుల్లోనూ తలొగ్గేది లేదని, తమ ఆత్మగౌరవాన్ని కాపాడుకుంటామని ఆయన గట్టిగా తేల్చిచెప్పారు.

Also Read : చైనా గూఢచారితో ఎన్విడియా సీఈఓ హనీట్రాప్ వివాదం.. ఆమె బ్యాగ్రౌండ్ తెలిస్తే షాక్ కావాల్సిందే!