అమెరికా మధ్యంతర ఎన్నికల వేళ ఒహాయో రాష్ట్ర గవర్నర్ పదవికి జరిగిన హోరాహోరీ పోరులో సంచలన ఫలితం వెలువడింది. రిపబ్లికన్ పార్టీ అభ్యర్థి, భారత సంతతికి చెందిన ప్రముఖ వ్యాపారవేత్త వివేక్ రామస్వామిపై డెమోక్రాటిక్ పార్టీ అభ్యర్థి అమీ ఆక్టన్ అద్భుత విజయాన్ని సాధించారు. గత 20 సంవత్సరాల కాలంలో ఒహాయో గవర్నర్‌గా ఎన్నికైన తొలి డెమోక్రాట్‌గా.. అలాగే రాష్ట్ర చరిత్రలోనే అత్యున్నత పదవిని చేపడుతున్న మొట్టమొదటి మహిళగా అమీ ఆక్టన్ రికార్డు సృష్టించారు.

ఒహాయో ఒకప్పుడు కీలకమైన స్వింగ్ స్టేట్‌గా ఉండేది. అయితే డొనాల్డ్ ట్రంప్ హయాంలో ఈ రాష్ట్రం క్రమంగా రిపబ్లికన్ల వైపు మొగ్గుచూపింది. దాంతో డెమోక్రాట్లు ఇక్కడ ఆశలు వదులుకున్న తరుణంలో అమీ ఆక్టన్ సాధించిన విజయం పార్టీకి సరికొత్త ఊపిరి పోసింది. పక్కా రిపబ్లికన్ గడ్డపై డెమోక్రాట్ల జెండా ఎగరేయడం ద్వారా ఆమె విశ్లేషకులను సైతం విస్మయానికి గురిచేశారు.

ఈ ఎన్నికల పోరులో రామస్వామి బృందం, ఆయన మిత్రపక్షాలు అపారమైన నిధులను చుమ్మాయి. బిలియనీర్ ఎలాన్ మస్క్ ఒక్కరే రిపబ్లికన్ పొలిటికల్ యాక్షన్ కమిటీకి కనీసం 5 మిలియన్ డాలర్ల విరాళం ఇచ్చారంటే అక్కడ ఏ స్థాయిలో ఖర్చు పెట్టారో అర్థం చేసుకోవచ్చు. ప్రతిపక్షం తనపై 100 మిలియన్ డాలర్లకు పైగా భారీ మొత్తాన్ని ఖర్చు చేసినప్పటికీ తీవ్రమైన ఆర్థిక ప్రతికూలతలను దాటుకుని అమీ ఆక్టన్ ఘన విజయం సాధించడం గమనార్హం.

Also Read : అమెరికా ఎన్నికల్లో సంచలనం.. జిహాదీ అన్న ట్రంప్‌కు బిగ్ షాక్.. యూఎస్ తొలి ముస్లిం సెనేటర్‌గా అబ్దుల్ చరిత్ర!

ఎన్నికల ప్రచారంలో భాగంగా రామస్వామి బృందం అమీ ఆక్టన్ వ్యక్తిగత, కుటుంబ నేపథ్యాన్ని లక్ష్యంగా చేసుకుని వివాదాస్పద ప్రకటనలు విడుదల చేసింది. ఆక్టన్‌కు దూరమైన ఆమె తల్లి విమర్శిస్తున్న దృశ్యాలతో ఈ ప్రకటనను రూపొందించారు. దీనిపై ఒహాయో రిపబ్లికన్ గవర్నర్ మైక్ డివైన్‌తో సహా ఉభయ పక్షాల నేతల నుంచి తీవ్ర విమర్శలు వ్యక్తమయ్యాయి. అయితే అమెరికా అధ్యక్షుడు డొనాల్డ్ ట్రంప్ ఈ ప్రకటనను సమర్థించగా ఉపాధ్యక్షుడు జేడీ వాన్స్ కూడా దీనికి మద్దతు పలికారు. ఈ రకమైన ప్రతికూల ప్రచారం కూడా రామస్వామికి ఓటర్లలో వ్యతిరేకతను పెంచిందని భావిస్తున్నారు.

ప్రజారోగ్య వైద్యురాలైన అమీ ఆక్టన్ కోవిడ్-19 సమయంలో ఒహాయో రాష్ట్ర ఆరోగ్య శాఖ డైరెక్టర్‌గా సేవలందించారు. ఆమె తన ప్రచారంలో స్థానిక ప్రజల సమస్యలైన వైద్య సంరక్షణ వ్యయం తగ్గించడం, అందరికీ నాణ్యమైన వైద్యాన్ని అందించడంపై ప్రధానంగా దృష్టి సారించారు. అంతేకాకుండా బాల్యంలో తాను ఎదుర్కొన్న నిరాశ్రయత, శీతాకాలంలో గుడారాల్లో గడిపిన కష్టాలమయ జీవితాన్ని వివరించి కార్మిక, మధ్యతరగతి ఓటర్ల మనసులను గెలుచుకున్నారు.

మరోవైపు పోలింగ్‌కు ముందు రామస్వామి తక్కువ ఆస్తి పన్నులు, తక్కువ విద్యుత్ బిల్లులు, సరసమైన గృహ నిర్మాణాలు, సురక్షితమైన వీధులపై ఓటర్లకు అనేక వాగ్దానాలు చేశారు. అయితే ఓటర్లు మాత్రం ప్రజా క్షేత్రంలో నిలబడిన అమీ ఆక్టన్ వైపే మొగ్గు చూపారు. 50 ఏళ్ల రాజకీయ జీవితం తర్వాత మైక్ డివైన్ నిష్క్రమించడంతో గతంలో ఏ ఎన్నికల పదవిలో లేని అమీ ఆక్టన్ నేరుగా ఒహాయో కార్యనిర్వాహక బాధ్యతలను చేపట్టనున్నారు.

Also Read : అమెరికాలో ట్రంప్‌కు పరీక్ష.. యావత్ ప్రపంచం దృష్టి అబ్దుల్‌పైనే!