
పశ్చిమాసియా ప్రాంతం మళ్లీ యుద్ధ మేఘాలతో అట్టుడుకుతోంది. ఒకవైపు శాంతి చర్చలు నడుస్తున్నాయని ప్రకటనలు చేస్తూనే.. మరోవైపు అమెరికా సైన్యం అనూహ్యంగా ఇరాన్పై పరిమిత దాడులకు దిగింది. ఇరాన్కు చెందిన గగనతల రక్షణ వ్యవస్థలను లక్ష్యంగా చేసుకుని ఈ దాడులు జరిగాయి. చమురు నౌకల రవాణాకు అత్యంత కీలకమైన ఖ్వెష్మ్ ద్వీపంలోని సుజా ప్రాంతంలో భారీ పేలుళ్ల శబ్దాలు వినబడినట్లు ఇరాన్ వర్గాలు తెలిపాయి. అయితే ఇది కేవలం ఐదు నిమిషాల్లో ముగిసిన చిన్నపాటి సైనిక చర్య మాత్రమేనని అమెరికా అధ్యక్షుడు డొనాల్డ్ ట్రంప్ స్పష్టం చేశారు. ఒప్పందాల కోసం ఇరాన్, ఖతార్, అమెరికా మధ్య మంతనాలు సాగుతున్న తరుణంలో ఈ సైనిక దాడి జరగడం ప్రపంచ దేశాలను తీవ్ర కలవరానికి గురిచేస్తోంది.
ఇరాన్పై పూర్తిస్థాయిలో దాడులు పునరుద్ధరించేందుకు అమెరికా సెంట్రల్ కమాండ్ భారీ ప్రణాళికలు రూపొందించినట్లు తెలుస్తోంది. శ్వేతసౌధం నుంచి ఆమోదం లభించిన మరుక్షణమే విరుచుకుపడేందుకు అమెరికా సైన్యం సర్వసన్నద్ధంగా ఉంది. మరోవైపు ఇరాన్ కూడా దీనిపై తీవ్రంగా స్పందించింది. తమ బాలిస్టిక్ క్షిపణుల పరిధిని 2,000 కిలోమీటర్లకే పరిమితం చేసుకున్న పాత నిబంధనను ఎత్తివేస్తున్నట్లు ప్రకటించింది. మరింత ఎక్కువ దూరం దూసుకెళ్లే శక్తిమంతమైన ఆయుధాలను తయారు చేసుకుంటామని హెచ్చరించింది.
ఇరాన్ అణ్వాయుధాలు సాధించకుండా తాను అడ్డుకోకపోయి ఉంటే ఈపాటికి ఇజ్రాయెల్తో పాటు పశ్చిమాసియా మొత్తమే మ్యాప్లో లేకుండా పోయేదని డొనాల్డ్ ట్రంప్ సోషల్ మీడియా వేదికగా వ్యాఖ్యానించారు. ఈ ఉద్రిక్తతల మధ్య ఇరాక్ ప్రధాని అలీ ఫలేహ్ అల్-జైదీ నేరుగా ట్రంప్తో ఫోన్లో మాట్లాడారు. పొరుగు దేశాలపై దాడులు చేయడానికి తమ దేశ భూభాగాన్ని అమెరికా సైన్యం ఎట్టి పరిస్థితుల్లోనూ వాడుకోకూడదని గట్టిగా స్పష్టం చేశారు. ప్రాంతీయ స్థిరత్వం దెబ్బతినకుండా ఉండేందుకే తాము ఈ నిర్ణయం తీసుకున్నట్లు ఇరాక్ పేర్కొంది.
మరోవైపు యెమెన్లోని హూతీ తిరుగుబాటుదారులు కూడా ఈ పోరులోకి దిగారు. సౌదీ అరేబియాలోని రియాద్ విమానాశ్రయం, ఆరాంకో చమురు సంస్థలు, సౌదీ సైనిక స్థావరాలపై దాడులు చేసినట్లు వారు వెల్లడించారు. ఇటీవల యెమెన్ రాజధాని సనా సమీపంలో జరిగిన వైమానిక దాడుల్లో 27 మంది అలాగే దక్షిణ యెమెన్ మార్కెట్పై జరిగిన దాడిలో 30 మంది ప్రాణాలు కోల్పోయారు. ఈ దాడులకు సౌదీ అరేబియానే కారణమని ఆరోపిస్తూ దానికి ప్రతీకారంగానే తాము సౌదీ లక్ష్యాలపై విరుచుకుపడ్డామని హూతీ సైనిక ప్రతినిధి స్పష్టం చేశారు.
ఈ యుద్ధ వాతావరణంలో అమెరికా సైన్యం ఒక సంచలన ఆఫర్ను ప్రకటించింది. ఇరాన్ అణు కార్యక్రమాలు, అణు కేంద్రాలు, పరికరాలు, శాస్త్రవేత్తలు, కీలక సిబ్బందికి సంబంధించిన ఖచ్చితమైన సమాచారం అందించిన వారికి ఏకంగా 2 కోట్ల డాలర్లు పారితోషికం ఇస్తామని ప్రకటించింది. ‘రివార్డ్ ఫర్ జస్టిస్’ ప్రోగ్రామ్ కింద ఈ భారీ నజరానాతో పాటు సమాచారం ఇచ్చే వారికి సురక్షిత ప్రాంతాల్లో పునరావాసం కల్పిస్తామని హామీ ఇచ్చింది. దీంతో పశ్చిమాసియాలో దౌత్యం, మిలిటరీ దాడులు, ఇంటెలిజెన్స్ గేమ్లు అన్నీ ఒకేసారి పతాక స్థాయికి చేరాయి.









