అంతర్జాతీయ రాజకీయాల్లో ఒక కీలక పరిణామం చోటుచేసుకోనుంది. ప్రపంచ అగ్రరాజ్యాలైన అమెరికా, చైనా, రష్యా దేశాధినేతలు ఒకే వేదికపై సమావేశం కానున్నట్లు వైట్‌హౌస్ అధికారికంగా వెల్లడించింది. చైనాలోని షెన్‌జెన్‌లో జరగనున్న ఆసియా-పసిఫిక్ ఎకనామిక్ కోఆపరేషన్ సదస్సు సందర్భంగా అమెరికా అధ్యక్షుడు డొనాల్డ్ ట్రంప్, చైనా అధ్యక్షుడు షీ జిన్‌పింగ్, రష్యా అధ్యక్షుడు వ్లాదిమిర్ పుతిన్ భేటీ కానున్నారు. ఇదే జరిగితే, ఈ మూడు దేశాల అగ్రనేతల మధ్య జరగబోయే తొలి త్రైపాక్షిక మీటింగ్ ఇదే అవుతుంది.

వైట్‌హౌస్ ప్రతినిధి ఒలివియా వేల్స్ తెలిపిన వివరాల ప్రకారం, ఈ సమావేశంలో ప్రధానంగా ప్రపంచవ్యాప్తంగా అణ్వాయుధాల తగ్గింపు (న్యూక్లియర్ డిజార్మమెంట్), ఇరాన్ పరిస్థితులు, అంతర్జాతీయ భద్రతా అంశాలపై ట్రంప్ చర్చించనున్నారు. అణ్వాయుధాల విస్తరణ ప్రమాదకరమని ట్రంప్ భావిస్తున్నట్లు ఆమె పేర్కొన్నారు. అయితే, ఈ భేటీలోనే ఏదైనా ఫైనల్ అగ్రిమెంట్ కుదిరే అవకాశం లేదని, ఇది మూడు దేశాల మధ్య ఉన్నతస్థాయి చర్చలకు ఒక ఫస్ట్ స్టెప్ మాత్రమేనని అమెరికా ఉన్నతాధికారులు స్పష్టం చేశారు. ఇక రష్యా-ఉక్రెయిన్ యుద్ధం గురించి ఈ సమావేశంలో చర్చించే ఉద్దేశం ట్రంప్‌కు లేదని అధికారులు వెల్లడించారు.

ట్రంప్ తన ఆసియా టూర్‌లో భాగంగా ముందుగా ఫిలిప్పీన్స్ రాజధాని మనీలాకు చేరుకుని ASEAN సదస్సులో పాల్గొంటారు. అక్కడి అధ్యక్షుడు ఫెర్డినాండ్ మార్కోస్ జూనియర్‌తో బైలేటరల్ మీటింగ్ నిర్వహించిన అనంతరం షెన్‌జెన్‌కు వెళ్తారు. అక్కడ ముందుగా జిన్‌పింగ్‌తో ప్రత్యేకంగా సమావేశమై వర్కింగ్ లంచ్‌లో పాల్గొంటారు. ఆ తర్వాతే పుతిన్‌తో కలిసి త్రైపాక్షిక భేటీ అవుతారు. అయితే ట్రంప్, పుతిన్ మధ్య ప్రత్యేకంగా వన్-టు-వన్ మీటింగ్ షెడ్యూల్‌లో లేదని వైట్‌హౌస్ వర్గాలు తెలిపాయి.

ఈ చైనా పర్యటనలో టెస్లా అధినేత ఎలాన్ మస్క్ కూడా ట్రంప్‌తో పాటు వెళ్లనున్నారు. కానీ జిన్‌పింగ్, పుతిన్‌లతో జరిగే కీలక భేటీలో మస్క్ పాల్గొనరని అధికారులు స్పష్టం చేశారు. తక్షణమే పెద్ద ఒప్పందాలు జరగకపోయినా, మూడు అగ్రరాజ్యాల అధినేతలు ఒకే వేదికపైకి రావడం గ్లోబల్ పాలిటిక్స్‌లో ఆసక్తికర పరిణామంగా మారింది.