
రావల్పిండిలోని అదియాలా జైల్లో శిక్ష అనుభవిస్తున్న పాకిస్థాన్ మాజీ ప్రధాని ఇమ్రాన్ ఖాన్ తన లాయర్ల ముందు ఆందోళన వ్యక్తం చేశారు. ప్రస్తుతం తన బెయిల్, వ్యక్తిగత కేసులు పక్కన పెట్టి, తీవ్ర అనారోగ్యంతో బాధపడుతున్న తన భార్య బుష్రా బీబీకి సరైన ట్రీట్మెంట్ అందేలని తన లీగల్ టీమ్కు తేల్చి చెప్పారు. PTI సీనియర్ నేత, న్యాయవాది బారిస్టర్ గౌహర్ అలీ ఖాన్ జైలులో ఇమ్రాన్తో సమావేశమైన సందర్భంగా ఈ కీలక పరిణామాలు చోటుచేసుకున్నాయి.
బుష్రా బీబీ ఆరోగ్య పరిస్థితిపై ఆందోళన
2023 నుంచి వేర్వేరు కేసుల్లో జైలు జీవితం గడుపుతున్న ఇమ్రాన్ ఖాన్, ఆయన సతీమణి బుష్రా బీబీలను ప్రభుత్వం ఉద్దేశపూర్వకంగానే టార్గెట్ చేస్తోందనే ఆరోపణలు ఉన్నాయి. గత కొంతకాలంగా బుష్రా బీబీ తీవ్ర కంటి సమస్యలతో పాటు ఇతర హెల్త్ ప్రాబ్లమ్స్తో బాధపడుతున్నారు. జైలు అధికారులు ఆమె మెడికల్ ట్రీట్మెంట్పై ఏమాత్రం శ్రద్ధ చూపడం లేదని ఇమ్రాన్ తీవ్ర అసహనం వ్యక్తం చేశారు. తక్షణమే మెరుగైన వైద్యం అందకపోతే ఆమె ఆరోగ్యం మరింత విషమించే ప్రమాదం ఉందని ఆవేదన చెందారు.
లీగల్ టీమ్కు స్పష్టమైన ఆదేశాలు
లాయర్లతో భేటీలో ఇమ్రాన్ ఖాన్ మాట్లాడుతూ.. “ప్రస్తుతం నా కేసుల గురించి ఆలోచించవద్దు. లాయర్లంతా వెంటనే కోర్టుకు వెళ్లి బుష్రా బీబీకి రిలీఫ్ లభించేలా పిటిషన్లు ఫైల్ చేయండి. ఆమెను బయటకు తీసుకొచ్చి సరైన ట్రీట్మెంట్ అందించడమే మన టాప్ ప్రయారిటీ కావాలి” అని స్పష్టం చేశారు. భార్యను కలిసేందుకు కూడా జైలు అధికారులు అనుమతించడం లేదని ఆయన గతంలోనే కోర్టును ఆశ్రయించారు.
పోరాటం ఆగదు: పార్టీ శ్రేణులకు పిలుపు
భార్య ఆరోగ్యంపై కలత చెందుతూనే, రాజకీయంగా తాను ఎవరికీ తలవంచేది లేదని ఇమ్రాన్ ఖాన్ తేల్చి చెప్పారు. ఖైబర్ పఖ్తుంఖ్వాలో విధించిన ఎమర్జెన్సీ వంటి తాజా పొలిటికల్ డెవలప్మెంట్స్ అన్నీ తనకు తెలుసని, ప్రభుత్వ నిర్బంధాలకు భయపడకుండా పార్టీ లీడర్లు, క్యాడర్ అంతా ఐక్యంగా పోరాడాలని పిలుపునిచ్చారు. వీరిద్దరినీ ఇస్లామాబాద్ జైలుకు షిఫ్ట్ చేసేందుకు సన్నాహాలు జరుగుతున్న వేళ, ఇమ్రాన్ చేసిన ఈ వ్యాఖ్యలు పాక్ రాజకీయాల్లో తీవ్ర చర్చనీయాంశంగా మారాయి.









