
ఎన్నికల్లో గెలిచి ప్రజలకు సేవ చేయాలన్న ఓ యువ నాయకురాలి కల మధ్యలోనే ఆవిరైపోయింది. గెలుపు కోసం పోరాడి విజయం సాధించిన ఆ నాయకురాలు.. మృత్యువుతో జరిగిన పోరాటంలో మాత్రం ఓడిపోయారు. ఎంతోమంది ప్రజల మనసును గెలుచుకుని.. చివరికి మృత్యువు ఒడికి చేరడం ఆ గ్రామస్థులను కలచివేసింది. ఈ విషాద ఘటన ఏపీలోని తూర్పుగోదావరి జిల్లా దేవరపల్లి మండలం ధుమంతునిగూడెం గ్రామంలో చోటుచేసుకుంది.
ఆమె పేరు గారపాటి దివ్య. 28 ఏళ్ల మహిళ. ఆమెకు ప్రేమ వివాహం జరిగి ఐదేళ్లు, మూడు నెలల వయసున్న ఇద్దరు పిల్లలు ఉన్నారు. తన వార్డును ఎంతో అభివృద్ధి చేయాలనే గొప్ప ఆశయంతో ఆమె ఇటీవల జరిగిన ఎన్నికల బరిలో నిలిచారు. జనసేన పార్టీ తరపున పోటీలోకి దిగారు. ప్రజల మధ్యే ఉంటూ అందరి మనస్సులు గెలుచుకున్నారు. ప్రజలు కూడా ఆమెకు మద్దతుగా నిలిచారు.
పోలింగ్ సమయంలో ప్రశాంతంగా ఓటు వేసిన ఆమె.. ఆ తర్వాత కొద్దిసేపటికే తీవ్రమైన కడుపునొప్పితో తీవ్రంగా బాధపడ్డారు. గమనించిన కుటుంబ సభ్యులు వెంటనే ఆమెను హాస్పిటల్కు తీసుకెళ్లారు. అక్కడ చికిత్స అందించడంతో.. మొదట ఆమె కోలుకున్నారని భావించి ఇంటికి తీసుకొచ్చారు. కానీ ఆ సంతోషం ఎంతసేపు నిలవలేదు. నిన్న ఉదయం మరోసారి ఆమె ఆరోగ్యం ఒక్కసారిగా క్షీణించింది. దీంతో ఆమెను రాజమహేంద్రవరం హాస్పిటల్కు తీసుకెళ్తుండగా.. మార్గమధ్యంలోనే గుండెపోటుతో ఆమె ప్రాణాలు విడిచారు.
సరిగ్గా ఆమె నిన్న మృతి చెందగా.. ఇవాళ వెలువడిన ఫలితాల్లో దివ్య ఏకంగా 350 ఓట్ల భారీ మెజార్టీతో ఘన విజయం సాధించారు. ప్రజలు ఆమెకు పట్టం కట్టి గెలిపించారు. కానీ ఆ గెలుపును కళ్ళారా చూసి ఆనందించడానికి ఆ నాయకురాలు ప్రాణాలతో లేకపోవడం కుటుంబ సభ్యులను, గ్రామస్తులను కలచివేసింది.
ఈ విషయం తెలుసుకున్న గోపాలపురం ఎమ్మెల్యే వెంకటరాజు, జనసేన ఇన్ఛార్జి సువర్ణరాజుతో పాటు కూటమి నాయకులు ఆమె భౌతికకాయాన్ని సందర్శించి నివాళులర్పించారు. కుటుంబానికి ధైర్యం చెప్పి తక్షణ సాయంగా రూ.లక్ష అందజేశారు.









