ఆంధ్రప్రదేశ్ రాష్ట్ర ఎన్నికల సంఘం రాబోయే గ్రామ పంచాయతీ ఎన్నికలకు సంబంధించి అభ్యర్థుల అర్హతలు, నిబంధనలు, నామినేషన్ ప్రక్రియపై స్పష్టమైన మార్గదర్శకాలను విడుదల చేసింది. పంచాయతీ ఎన్నికల్లో పోటీ చేయాలనుకునేవారు తెలుసుకోవాల్సిన కనీస వయస్సు, విద్యార్హతలు, మారిన సంతాన నిబంధనలు, రిజర్వేషన్ల పూర్తి వివరాలు తెలుసుకోవాలి. మరి అవేంటో చూద్దాం.

Also Read : నిన్న గుండెపోటుతో మృతి.. నేడు ఎన్నికల ఫలితాల్లో ఘన విజయం.. జనసేన అభ్యర్థి కన్నీటి స్టోరీ..!

కనీస వయస్సు నిబంధన

ఆంధ్రప్రదేశ్ పంచాయతీ రాజ్ చట్టం సెక్షన్ 17 ప్రకారం సర్పంచ్ లేదా వార్డు సభ్యునిగా నామినేషన్ వేసే అభ్యర్థికి నామినేషన్ల పరిశీలన తేదీ నాటికి కనీసం 21 సంవత్సరాలు పూర్తి కావాలి. సాధారణ ఎమ్మెల్యే లేదా ఎంపీ ఎన్నికల్లో పోటీ చేయడానికి 25 ఏళ్లు అవసరమైనప్పటికీ.. పంచాయతీ ఎన్నికలలో 21 ఏళ్లు నిండిన పౌరుడెవరైనా పోటీ చేసేందుకు పూర్తి అర్హత కలిగి ఉంటారు.

సంతాన నిబంధన సంపూర్ణ రద్దు

గతంలో ఇద్దరికంటే ఎక్కువ సంతానం ఉన్నవారు స్థానిక సంస్థల ఎన్నికల్లో పోటీ చేయడానికి అనర్హులనే నిబంధన ఉండేది. అయితే ఆంధ్రప్రదేశ్ ప్రభుత్వం సెక్షన్ 19(3)ని రద్దు చేస్తూ A.P.P.R. (Amendment) Act, 2024 (చట్టం నెం. 1/2025 – G.O.Ms.No.19) ద్వారా ఈ నిబంధనను పూర్తిగా తొలగించింది. కాబట్టి ప్రస్తుతం ఇద్దరికంటే ఎక్కువ మంది పిల్లలు ఉన్న మహిళలు, పురుషులు ఇద్దరూ నిర్భయంగా నామినేషన్ దాఖలు చేయవచ్చు.

విద్యార్హత అవసరం లేదు

సర్పంచ్ లేదా వార్డు సభ్యునిగా పోటీ చేసేందుకు ఎలాంటి కనీస చదువు నిబంధన లేదు. చదువుకున్న వారైనా లేదా నిరక్షరాస్యులైనా సమానంగా పోటీ చేయవచ్చు. అభ్యర్థి తన విద్యాభ్యాస వివరాలను నామినేషన్‌తో పాటు సమర్పించే స్వీయ డిక్లరేషన్ ఫారమ్‌లో సమాచారం నిమిత్తం తెలియజేస్తే సరిపోతుంది.

ఓటరు నమోదు

అభ్యర్థి పేరు సదరు గ్రామ పంచాయతీ ఓటర్ల జాబితాలో ఏదో ఒక వార్డులో తప్పనిసరిగా నమోదై ఉండాలి. ఆ గ్రామంలోని ఏ వార్డుకు చెందిన ఓటరైనా ప్రతిపాదకునిగా సంతకం చేయవచ్చు. అభ్యర్థి పోటీ చేస్తున్న సంబంధిత వార్డులోని ఓటరు మాత్రమే ప్రతిపాదకునిగా ఉండాలి.

మహిళలకు 50% రిజర్వేషన్లు

సుప్రీం కోర్టు ఆదేశాలు, పంచాయతీ రాజ్ నిబంధనల ప్రకారం మొత్తం స్థానాల్లో సరిగ్గా 50 శాతం స్థానాలను మహిళలకు కేటాయించారు. ఎస్సీ, ఎస్టీ, బీసీ, జనరల్ కేటగిరీల్లోని సగం సీట్లు మహిళలకే ప్రత్యేకం. అంతేకాకుండా మహిళలు జనరల్ కేటగిరీ సీట్లలో కూడా పోటీ పడవచ్చు.

పోటీకి అనర్హులు ఎవరు?

కేంద్ర, రాష్ట్ర ప్రభుత్వ ఉద్యోగులు, స్థానిక సంస్థల సిబ్బంది, కాంట్రాక్ట్, కన్సోలిడేటెడ్ వేతనం పొందే ఉద్యోగులు నామినేషన్ల పరిశీలన నాటికి రాజీనామా ఆమోదం పొందకుండా పోటీ చేయరాదు. హైకోర్టు తీర్పుల ప్రకారం అంగన్‌వాడీ కార్యకర్తలు, APSRTC ఉద్యోగులు స్థానిక ఎన్నికల్లో పోటీ చేయడానికి అనర్హులు. రేషన్ డీలర్లు (FPS Dealers), వాటర్ యూజర్స్ అసోసియేషన్ సభ్యులు, దేవాదాయ ట్రస్ట్ బోర్డు సభ్యులు లాభదాయక పదవుల కింద పోటీకి అనర్హులు. న్యాయస్థానం ద్వారా జైలు శిక్ష పొందిన వారు విడుదలైన తేదీ నుంచి 5 ఏళ్ల పాటు పోటీ చేయరాదు.

Also Read : స్నేహితురాలిని కాపాడిన లక్ష్మికి బంపరాఫర్.. ఆనంద్ మహీంద్రా సంచలన నిర్ణయం!

నామినేషన్ ఫీజు & డిపాజిట్ వివరాలు

సర్పంచ్ పదవికి సాధారణ అభ్యర్థులకు నామినేషన్ ఫీజు కింద రూ.3,000 డిపాజిట్ కాగా, ఎస్సీ, ఎస్టీ, బీసీ అభ్యర్థులకు 50% రాయితీతో రూ. 1500 మాత్రమే ఉంటుంది. వార్డు సభ్యునికి అయితే సాధారణ అభ్యర్థులకు రూ. 1,000 కాగా, ఎస్సీ, ఎస్టీ, బీసీ వర్గాలకు రూ. 500 డిపాజిట్ ఉంటుంది.

నామినేషన్ దాఖలుకు కావాల్సిన పత్రాలు

ఆంధ్రప్రదేశ్ గ్రామ పంచాయతీ ఎన్నికల్లో నామినేషన్ దాఖలు చేసే అభ్యర్థులు ముందుగా ఫారం-IIIలో అభ్యర్థి, ప్రతిపాదకుడి వివరాలు నింపి సమర్పించాలి. వీటితో పాటు ఆస్తులు, అప్పులు, నేర చరిత్ర, విద్యా వివరాలతో కూడిన స్వీయ ప్రకటన అఫిడవిట్, ఒరిజినల్ డిపాజిట్ చలానా రశీదు తప్పనిసరిగా జతచేయాలి. ఎస్సీ, ఎస్టీ, బీసీ అభ్యర్థులు డిపాజిట్ రాయితీ, రిజర్వేషన్ ప్రయోజనాల కోసం కుల ధృవీకరణ పత్రాన్ని, అలాగే అభ్యర్థి, ప్రతిపాదకుడి ఓటరు ఐడీ లేదా ఆధార్ కార్డు కాపీలను నామినేషన్ పత్రంతో పాటు సమర్పించాల్సి ఉంటుంది.

ఎన్నికల ప్రవర్తనా నియమావళి

పోలింగ్ ముగిసే సమయానికి 44 గంటల ముందే బహిరంగ ప్రచారాలు, ర్యాలీలు నిలిపివేయాలి. ఉదయం 6:00 నుంచి రాత్రి 10:00 గంటల వరకు మాత్రమే అనుమతి ఉంటుంది. రిటర్నింగ్ అధికారి (RO) గదిలోకి అభ్యర్థితో కలిపి గరిష్టంగా ముగ్గురికి మాత్రమే అనుమతి ఉంటుంది.